Asad Ostonada muxolifat bilan muzokaralar o‘tkazishga tayyorligini aytdi

Suriya prezidenti Bashar Asad mamlakat hukumati vakillari Ostonadagi muzokaralarda ishtirok etib, u yerda muxolifat bilan uchrashishga tayyorligini ma’lum qildi, deb yozadi “RBK”.

Foto: “TASS”

Fransiyalik jurnalistlar bilan suhbat chog‘ida Asad Suriya hukumati mamlakatda tinchlik o‘rnatish bo‘yicha barcha takliflarni ko‘rib chiqishga doimo tayyor ekanligini aytdi, ammo muxolifatdan aynan kim vakil bo‘lishi ham muhimligini qayd etdi.
“Agar ‘haqiqiy’ Suriya muxolifati bo‘lsa, ya’ni Saudiya Arabistoni, Fransiya va Buyuk Britaniya odamlari emas, oddiy suriyaliklar bo‘lsa, unda biz asosiy masalalarni muhokama qila olamiz”, — dedi Suriya prezidenti.
Shuningdek, Asad agar muxolifat uning lavozimdan ketishiga erishmoqchi bo‘lsa, konstitutsiyani qayta ko‘rib chiqishi kerakligini, bu esa faqat referendum o‘tkazish orqali amalga oshirilishi mumkinligini ta’kidladi.
Suriyadagi nizo tomonlari o‘rtasidagi muzokaralar 23-yanvar kuni Ostonada Rossiya va Turkiya ishtirokida bo‘lib o‘tishi kerak.
Batafsil | Подробно | Read more... Daryo