Tramp Ford va Fiat Chrysler’ga AQShda ish o‘rinlari yaratish qarori uchun minnatdorlik bildirdi

AQShning saylangan prezidenti Donald Tramp Ford va Fiat Chrysler avtomobil kompaniyalariga ular chet elda zavod qurmasdan, AQShda ish o‘rinlari yaratishga qaror qilgani uchun, minnatdorlik bildirdi, deb yozadi “TASS” Trampning Twitter’iga tayanib.

Foto: Business Insider

“Va nihoyat, bu sodir bo‘lmoqda, — deb yozdi saylangan prezident. — Fiat Chrysler hozirgina Michigan va Ogayodagi zavodlarga 1 milliard dollar investitsiya kiritishini, ikki mingta ish o‘rnini yaratishini e’lon qildi”.
“Bu o‘tgan hafta Ford Meksikada milliardlab dollarga zavod qurish o‘rniga, Michigandagi va AQShdagi ishlab chiqarish hajmini kengaytirishini aytganidan so‘ng bo‘ldi. Ford va Fiat, rahmat”, — deya qo‘shib qo‘ydi Tramp.
Nashr ta’kidlashicha, har ikkala kompaniya Tramp General Motors kompaniyasining Meksikada tayyorlangan avtomobillarini AQShga olib kirish uchun tariflar kiritishni taklif qilganidan so‘ng shunday bayonotlar bilan chiqqan.
Batafsil | Подробно | Read more... Daryo