Malayziya Boeing’ini qidirish ishlari yanvarda yakunlanadi

2014-yil martida yo‘qolib qolgan Malayziyaning Boeing samolyotini qidirish ishlari yanvarda yakunlanadi, deb yozadi “TASS” Avstraliyaning transportdagi xavfsizlik byurosiga tayanib.

Foto: Rambler News

Hind okeanida qidiruvlarni davom ettirayotgan Fugro Equator kemasi ishi yakuniga yetmoqda va agar ob-havo sharoitlari imkon yaratsa, yaqin kelajakda tugallanadi.
Qariyb uch yil davom etgan qidiruv chog‘ida Avstraliyadan g‘arbdagi 120 ming kvadrat kilometr maydonli hudud tekshirib chiqildi, ammo g‘oyib bo‘lgan avialaynerning hech qanday izi topilmadi.
O‘tgan hafta Malayziya transport vaziri qidiruv ishlari taxminan ikki haftadan so‘ng tugashini aytgan edi. Bundan tashqari, u Avstraliya, Xitoy va Malayziya vakillari uchrashib, keyingi qadamlarni aniqlashtirib olishini ma’lum qildi.
Malaysia Airlines’ga qarashli Boeing 777-200ER samolyoti 2014-yil 8-mart kuni Kuala-Lumpurdan Pekinga parvoz etayotib, radarlardan yo‘qolib qolgan. U Malayziya va Vyetnam chegarasini kesib o‘tganidan keyin bir necha daqiqa vaqt o‘tgach, aloqa uzilgan. Bevosita g‘oyib bo‘lishidan avval undan olingan xabarda biror muammo haqida gap ham bo‘lmagan. Samolyot bortida 12 nafar ekipaj a’zolari bilan birga jami 239 kishi bo‘lgan.
Batafsil | Подробно | Read more... Daryo