O‘zbekcha transfer. Jeparov Tehronga yetib bordi, “T-Tim”da o‘zbekistonliklar endi 2 ta, “Bunyodkor” Saudiya klubini mag‘lub etolmadi

Server Jeparov
Eron futbol klublaridan biriga o‘tgani ma’lum qilingan Server Jeparov Tehronga yetib keldi. U yangi klubi va uning vakillari bilan uchrashganini suratlardan bilish qiyin emas.

Foto: O‘FF

Avvalroq “Istiqlol” futbol klubi Jeparov uchun 800 ming dollar to‘lashi haqida xabar chiqqandi . Futbolchining Eron klubiga o‘tgani haqida aytgan “Lokomotiv” esa fors klubi nomiga ham, futbolchining narxiga ham oydinlik kiritmadi.

Foto: “Championat.asia”

Dilshod Sharofutdinov
O‘zining so‘nggi mavsumini Malayziyaning “T-Tim” klubi safida o‘tkazgan o‘zbekistonlik Dilshod Sharofutdinov, shu klub bilan shartnomasini uzaytirdi .

Foto: “T-Tim”

“Championat.asia” saytidagi xabarda shartnomaning qanchaga mo‘ljal qilingani oshkor etilmagan. Ikki kun muqaddam “T-Tim” Farhod Tojiyevni ham o‘z safiga qo‘shib olgandi.
Qatar Yulduzlar ligasi
Qatar Yulduzlar ligasining 16-turi o‘zbekistonlik futbolchilar uchun omadli kelmadi.
Sardor Rashidov to‘p suradigan “Al-Jaish” safarda “Al-Xor” klubiga qarshi maydonga tushdi va 0:0 hisobida durang o‘ynadi. Bundan avvalgi turda 2 ta gol urib, jamoasining g‘alabasini ta’minlagan Rashidov, bu safar ham to‘liq harakat qildi, biroq gol ura olmadi.

Foto: “Championat.asia”

Sanjar Tursunovning “Al-Haraytiyat” klubi “Al-Arabi” maydoniga safar uyushtirdi va 1:2 hisobida imkoniyatni boy berib qo‘ydi. Sanjar Tursunov uchrashuvda to‘liq ishtirok etdi, biroq jamoasini mag‘lubiyatdan qutqara olmadi.

Foto: “Championat.asia”

Yulduzlar ligasi turnir jadvali bilan tanishing.

Foto: Livescore.in

“Bunyodkor”
Amirlik yig‘inida bo‘lib turgan Toshkentning “Bunyodkor” futbol klubi Saudiyaning “Al-Faysaliy” klubiga qarshi o‘rtoqlik o‘yinida ishtirok etdi va 1:1 hisobiga imzo chekdi. “Qaldirg‘ochlar”ni mag‘lubiyatdan qutqarib qolgan golga 89-daqiqada Javohir Esonqulov mualliflik qildi.
“Bunyodkor” — “Al-Faysaliy” (Saudiya) 1:1
Gollar: 27 (0:1). Javohir Esonqulov, 89 (1:1).

Foto: “Bunyodkor”

Bunga qadar “Bunyodkor” BAAning “Ash-Shaab” klubini 2:1 hisobida mag‘lub etgan, Gana terma jamoasiga 0:2 hisobida imkoniyatni boy bergan va Xitoyning “Xenan Jianye” klubi bilan 1:1 hisobida durang o‘ynagandi.
Batafsil | Подробно | Read more... Daryo