Vatan himoyachilari kuni munosabati bilan bir guruh huquqni muhofaza qilish organlari, mudofaa va favqulodda vaziyatlar vazirliklari xodimlari mukofotlandi

12-yanvar kuni O‘zbekiston Prezidenti Shavkat Mirziyoyev “Vatan himoyachilari kuni va O‘zbekiston Respublikasi Qurolli Kuchlarining 25 yilligi munosabati bilan huquqni muhofaza qilish organlari, mudofaa va favqulodda vaziyatlar vazirliklari xodimlaridan bir guruhini mukofotlash to‘g‘risida”gi farmonni imzoladi. Farmon matnini O‘zA keltirdi .

Foto: O‘zA

Unga ko‘ra, O‘zbekiston Respublikasi Mudofaa vazirligi Bosh shtabi boshqarmasi boshlig‘ining o‘rinbosari Mallaboyev Abdusattor Ubaydullayevich “Yoshlarni milliy istiqlol g‘oyasi va ona Vatanga sadoqat ruhida tarbiyalash, yuqori malakali kadrlarni tayyorlashdagi alohida xizmatlari, davlatimizning mudofaa qudratini yanada yuksaltirish, milliy xavfsizlikni ta’minlash ishiga qo‘shayotgan salmoqli hissasi hamda ijtimoiy-siyosiy hayotdagi faol ishtiroki uchun” “O‘zbekiston Respublikasida xizmat ko‘rsatgan yoshlar murabbiysi” faxriy unvonini oldi.
O‘zbekiston Respublikasi Mudofaa vazirligi harbiy qism komandiri Xamrayev Abdulla Adxamovich “Davlatimizning mudofaa qudratini yanada yuksaltirish, milliy xavfsizlikni va davlat chegaralari daxlsizligini ta’minlash ishiga qo‘shayotgan katta hissasi, milliy manfaatlarimizni himoya qilish hamda tinchlik, barqarorlik va jamoat tartibini ta’minlash borasidagi xizmat burchini bajarish chog‘ida mardlik, jasorat va fidoyilik ko‘rsatgani uchun” I darajali “Shon-sharaf” ordeni bilan taqdirlandi.
Bundan tashqari qator huquqni muhofaza qilish organlari, mudofaa va favqulodda vaziyatlar vazirliklari xodimlari II darajali “Shon-sharaf” ordeni, “Do‘stlik”, “Mardlik” ordenlari, “Jasorat”, “Sodiq xizmatlari uchun”, “Shuhrat” medallari bilan mukofotlandi.
Batafsil | Подробно | Read more... Daryo