Odil Ahmedov “Shanxay SIPG” safidagi birinchi golini Saudiya klubi darvozasiga urdi

Qishki yig‘inni Qatar poytaxti Dohada o‘tkazgan “Shanxay SIPG” futbol klubi bugun — 17-yanvar kuni Xitoyga qaytib keldi. Bu haqda “Championat.asia” sayti ma’lumot berdi .

Foto: “Championat.asia”

16-yanvar kuni shanxayliklar yig‘in doirasidagi so‘nggi o‘rtoqlik uchrashuvini Saudiya Arabistonining “Al-Halij” klubiga qarshi o‘tkazib, 2:2 hisobida durang o‘ynadi. “Al-Halij” 14 ta klub to‘p suradigan Saudiya chempionatida 11-o‘rinni egallab turgandi.
Bellashuvni “Shanxay SIPG” safidagi legioner futbolchilardan Oskar, Xalk, Odil Ahmedov va Elkesen boshlang‘ich tarkibda o‘tkazdi. Gollarning birinchisiga Odil Ahmedov mualliflik qilgan bo‘lsa, ikkinchisi Vu Lei tomonidan kiritildi.
Endilikda “Shanxay SIPG” rasmiy o‘yinga tayyorgarlik ko‘radi. Andre Villash-Boash boshchilik qilayotgan jamoa Osiyo chempionlar ligasining pley-offi doirasida 7-fevral kuni maydonga tushadi. Raqib 31-yanvar kuni bo‘lib o‘tadigan Tailandning “Sukhotai” va Malayziyaning “Yadanarbon” klublari o‘rtasidagi o‘yindan so‘ng aniq bo‘ladi.

Foto: “Championat.asia”


Batafsil | Подробно | Read more... Daryo