Xitoy klublari uchun navbatdagi buyruq: futbolga sarf etilayotgan mablag‘ning 15 foizi akademiyalar rivoji uchun bo‘lishi shart

Mamlakat futbolini tubdan isloh qilish va rivojlantirish yo‘lida tinim bilmayotgan xitoyliklar Super liga klublari uchun navbatdagi talablarni ilgari surdi. Bu haqda “Sports.ru” sayti xabar berdi .

Foto: XFA

Xitoy futbol assotsiatsiyasi chempionat startiga bir oydan sal ko‘proq vaqt qolganida Super liga klublarining yangi mavsum uchun rejalari bilan hisoblashmay, legioner futbolchilar soniga bo‘lgan cheklov masalasini kuchaytirib qo‘ygandi. Endi esa tashkilot klublar uchun qo‘shimcha talablar qo‘ydi.


Xitoy kompaniyalari Yevropaning 14 ta klubini o‘zi bilan hisoblashishga majbur etib ulgurdi. Maqsad — yurt futbolini ko‘tarish


Birinchi navbatda Xitoy futbol klublari o‘ziga tegishli akademiyalar rivojiga e’tibor qaratishi kerak. Bunda bir yil davomida ishlatilgan pulning 15 foizi miqdorida futbol maktablari uchun ham sarf etish talab qilingan.
Agar klub 100 million dollarni katta futbol uchun sarf qilsa, akademiya uchun 15 millionning bahridan kechishi kerak. Chiqim qaysidir klubda 1 milliard bo‘lsa, akademiya uchun 150 million topish kerak bo‘ladi. Ya’ni, qimmat futbolchilarni o‘ynatib, ularga otning kallasidek pul to‘layotgan jamoalar, xitoylik yosh futbolchilarni rag‘batlantirish borasida ham xotamtoyroq bo‘lishi kerak. Bu o‘z navbatida pulni orqa-oldiga qaramay sarf etayotgan klublar hovurini bir oz bo‘lsa-da tushirish uchun xizmat qiladi.


Rasman: Xitoy legionerlar soniga cheklovni oshirdi. O‘zbekiston milliy termasi futbolchilari zaxirada qolishi mumkin


Har bir klub o‘zining U15, U17, U19 jamoalariga ega bo‘lishi shart. Bu Xitoy o‘smirlar va yoshlar terma jamoalarini rivojlantirish yo‘lida muhim qadam bo‘ladi. Shuningdek, har bir klub o‘zining zamonaviy sport bazasiga ega bo‘lib olishi kerak. Unda kamida 4 ta stadion mavjud bo‘lishi belgilab qo‘yildi, shuning hech bo‘lmaganda 1 donasi sun’iy qoplamali bo‘lishi lozim.
Assotsiatsiya klublar kirim va chiqimini nazorat qilib boradi. Bunda tashkilot mustaqil auditorlar yollab, klublarning pul aylanmasini tekshirib turadi. Sina axborot agentligining qayd etishicha, transfer oynasida sarf etilayotgan pullar uchun javobgarlik har bir klubda bo‘ladi. Bunda futbolchi uchun sarf etish mumkin bo‘lgan maksimal summa ko‘rsatib o‘tilmagan. Biroq uning taxminan 30 million yevrodan oshmasligi aytilgan.


Dunyodagi eng katta — Evergrande International Football School futbol akademiyasi qanday vujudga keldi?


Eng asosiysi, barcha klub menejerlari pul yuvish masalasida ogohlantirilgan. Homiylik tashkilotlari orqali kelib tushayotgan mablag‘larni o‘zlashtirish hukumat tomonidan jiddiy choralar ko‘rilishiga olib kelishi mumkin. Tashkilot esa bunday shaxslarni futboldan bir umrga chetlashtirishini aytgan.
Batafsil | Подробно | Read more... Daryo