“MYu” afsonasi: Ueyn Runi klub tarixidagi eng yaxshi to‘purarga aylandi (video)

“Manchester Yunayted” hujumchisi Ueyn Runi “Stok Siti”ga qarshi ( 1:1 ) APL 22-tur o‘yinining so‘nggi daqiqalarida jarimadan gol kiritib, klub uchun urgan gollari sonini 250 taga yetkazdi va “MYu” tarixidagi eng yaxshi to‘purarga aylandi.

Foto: Daily Mail

Bu ko‘rsatkich bo‘yicha Runi mankunianlar afsonasi ser Bobbi Charltonning (249 ta gol) o‘tgan asrning 70-yillaridan buyon saqlanib kelinayotgan rekordini yangiladi.

Ueyn Reni va ser Bobbi Charlton. Foto: Twitter / @WayneRooney

Ueyn Runi 2004-yili “Everton” klubidan “MYu” safiga kelib qo‘shilgandi. Shu kungacha u “qizil iblislar” safida barcha turnirlarda 546 o‘yin o‘tkazib, 250 ta golga mualliflik qildi.

Foto: Twitter / @ManUtd

31 yoshli futbolchi, shuningdek, APLning safar o‘yinlarida eng ko‘p gol kiritgan futbolchiga aylandi . Runi mehmonda o‘tkazilgan o‘yinlarda jami 88 ta gol urib, “Nyukasl” afsonasi Alan Shirerga tegishli bo‘lgan rekordni o‘ziniki qilib oldi.

Foto: Mirror

Runi APL tarixidagi eng yaxshi to‘purarlar ro‘yxatida “Blekbern” va “Nyukasl” sobiq hujumchisi Alan Shirerdan keyin ikkinchi o‘rinda bormoqda. “MYu” hujumchisi Premyer-ligada jami 195 ta gol kiritgan, Shirer hisobida esa 260 ta gol mavjud.
Bundan tashqari, Ueyn Runi Angliya terma jamoasining tarixdagi eng yaxshi to‘purari sanaladi. U mamlakat termasi safida 119 uchrashuv o‘tkazib, 53 ta golga mualliflik qilgan.

Foto: Sky Sports

“MYu” tarixidagi eng yaxshi to‘purarlar (barcha turnirlar inobatga olingan):
1. Ueyn Runi – 250 ta gol, 546 o‘yin (2004-yildan hozirgi vaqtgacha);
2. Bobbi Charlton – 249 ta gol, 748 o‘yin (1956–1973-yillar);
3. Denis Lou – 237 ta gol, 404 o‘yin (1962–1973-yillar);
4. Jek Rouli – 211 ta gol, 424 o‘yin (1937–1955-yillar);
5–6. Dennis Vayollet – 179 ta gol, 293 o‘yin (1953–1962-yillar);
5–6. Jorj Best – 179 ta gol, 470 o‘yin (1963–1974-yillar).



Ma’lumot uchun, Ueyn Runi “MYu” safida 5 karra Angliya chempioni, 4 karra Angliya Superkubogi, ikki marta Angliya Liga Kubogi va bir martadan Angliya Kubogi va YChL g‘olibi bo‘lgan.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ” ( @toshqindaryo )ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo