Serxio Ramos o‘z rekordini yangilagan kunda “Real” La liganing birinchi davrasini 1-o‘rinda yakunladi

Madridning “Real” klubi La liga 2016/17-yilgi mavsumi 1-davrasini peshqadam sifatida yakunladi. Klub ixtiyorida bitta zaxira o‘yini bor bo‘la turib, raqiblaridan o‘zib ketdi.

Foto: Fox Sports

Roppa-rosa bir yil muqaddam Kataloniyaning “Barselona” klubi 1-davrani 45 ochko bilan peshqadam sifatida yakunlagandi. “Real” esa 5 ochko kamroq jamg‘arib, 3-o‘rin bilan kifoyalangan. Mavsum yakunida chempionlik “Barselona”ga nasib qilgan. Klub “Real”dan 1 ochkolik farq bilan o‘zib ketgan.
“Real”ning bu boradagi ko‘rsatkichi o‘tgan yilgi “Barselona”nikidan yaxshiroq bo‘lishi mumkin, agar “Qirollik klubi” 15-fevral kuni bo‘lib o‘tadigan zaxira o‘yinida “Valensiya”ni taslim qila olsa. Ayni vaqtda Zidan jamoasining hisobida 43 ochko bor. 22-yanvar kuni “Barselona” “Eybar” maydonida zafar qucha olsa, 1-davrani 41 ochko bilan yakunlashi mumkin.
“Sports.ru” ma’lumotiga ko‘ra , “Real” 1-davrani peshqadam sifatida tugatgan 35 ta holatdan 23 tasida oltin medallarni qo‘lga kiritgan. So‘nggi 15 mavsumda Madrid superklubi to‘rtinchi bor 1-davra yetakchisi bo‘lish vazifasini uddalay oldi.
Serxio Ramos

Foto: Marca.com

“Real” sardori Serxio Ramos 19-tur doirasida “Malaga” darvozasini ikki bor ishg‘ol qilib, jamoasining g‘alabasini ta’minlab berdi. Shu tariqa himoyachi mavsum boshidan buyon urgan gollari sonini 6 taga yetkazib oldi.
Bu holat Ramos uchun rekord ko‘rsatkich hisoblanadi. “Qirollik klubi” sardori bunga qadar butun bir mavsum davomida 5 tadan ortiq gol urmagandi. Ayni vaqtga kelib esa mavsumning yarmidayoq 6 bor muvaffaqiyat qozonib ulgurdi.
Batafsil | Подробно | Read more... Daryo