O‘zbekistonga 57,5 mln so‘mlik sifatsiz oziq-ovqat mahsulotlari noqonuniy olib kirilishining oldi olindi

Sifati kafolatlanmagan va tegishli hujjatlari bo‘lmagan oziq-ovqat mahsulotlarini noqonuniy yo‘llar bilan O‘zbekistonga olib kirishga bo‘lgan urinishlar uchrab turibdi. Bojxona xodimlari tomonidan mazkur holatlarga o‘z vaqtida chek qo‘yish maqsadida qator chora-tadbirlar amalga oshirilib, qonunbuzarlik holatlarining oldi olinmoqda. Bu haqda “Daryo”ga Toshkent shahar bojxona boshqarmasi axborot xizmati xabar berdi.

Foto: Toshkent shahar bojxona boshqarmasi axborot xizmati

Jumladan, Toshkent shahar bojxona boshqarmasi xodimlari tomonidan huquqni muhofaza qiluvchi idoralar vakillari bilan hamkorlikda o‘tkazilgan tezkor tadbir davomida fuqarolar Roziqov, Alimova va Isayevlarning (ism- shariflar o‘zgartirilgan) qilmishlariga chek qo‘yildi. Yurtdoshlari salomatligini xavfga qo‘yib bo‘lsa-da, o‘z cho‘ntagini qappaytirishni ko‘zlagan ushbu shaxslarning sifatsiz hamda iste’mol muddati o‘tib ketgan oziq-ovqatlarni ichki bozorda pullash rejalari chippakka chiqdi.
Yuk egalari og‘irligi 1,8 tonnadan, qiymati esa 57,5 million so‘mdan ortiq bo‘lgan oziq-ovqat mahsulotlariga bojxona rasmiylashtiruvini tasdiqlovchi biror hujjat taqdim eta olmadi. Mahsulotlarning yorliqlari ko‘zdan kechirilganda, amaldagi tartiblarga zid ravishda tovarlar davlat tilida markalanmagani ham aniqlandi.
Ma’lumot uchun, 2016-yil davomida respublika bojxona xodimlari va boshqa huquqni muhofaza qiluvchi idoralar bilan hamkorlikda 3400 dan ortiq holatda qiymati salkam 4 milliard so‘mlik oziq-ovqat mahsulotlarining noqonuniy harakatiga chek qo‘yildi.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ” ( @toshqindaryo )ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo