“Lokomotiv” OChL yarim finaliga bormoqchi. Biroq Lacetti olgach, 6 yetakchi futbolchi jamoani tark etdi

O‘z tarixida ilk bor mamlakat chempionligini qo‘lga kiritgan Toshkentning “Lokomotiv” futbol klubi futbolchilari sovg‘a sifatida rahbariyatdan Lacetti avtomobillarini qabul qilib olgandi . Ayni paytda shularning 5 nafari “temiryo‘lchilar” bilan xayrlashib ulgurdi.

Foto: “Lokomotiv”

Klub uch nafar futbolchi bilan shartnomani uzaytirishni istamadi. Qiziq tomoni, ular turli xil pozitsiyalarda to‘p surayotgandi: himoyachi Nemanya Yanichich (Serbiya), yarim himoyachi Artur Gevorkyan (Turkmaniston) va hujumchi Ivan Nagayev (O‘zbekiston).
Yanichich so‘nggi ikki mavsumini “Lokomotiv” safida o‘tkazdi. 2016-yilning katta qismida esa jarohati sabab “temiryo‘lchilar”ga yordam bera olmadi. Artur Gevorkyan o‘tgan mavsumning ikkinchi yarmida safga qo‘shildi va yarim yildayoq Toshkent grandi bilan xayrlashdi. Ivan Nagayev jarohatlardan qutula olmadi va o‘ziga bildirilgan ishonchni oqlamadi. Mavsum so‘nggida unga Lacetti ham nasib qilmadi va faqatgina pul mukofoti bilan cheklandi.

Foto: “Lokomotiv”

“Lokomotiv” safini yana uch futbolchi xorij klublariga o‘tib ketgani uchun tark etdi. Avvaliga Server Jeparov Eronning “Istiqlol” klubi bilan shartnoma imzolagan bo‘lsa, keyinroq Qatarning “As-Sayliya” klubi hujumchi Temurxo‘ja Abduxoliqov va yarim himoyachi Sanjar Shoahmedovni o‘z safiga qo‘shib oldi .
Bu futbolchilar “Lokomotiv”ni tark etmagan bir paytda klub Osiyo chempionlar ligasining yarim finaliga yetib borishni ko‘zlayotgani haqida xabar chiqqandi . Ayni vaqtda “temiryo‘lchilar”ning mazkur musobaqadagi eng yaxshisi natijasi chorak final bo‘lib turibdi.
Oliy ligada 22 ta gol urib, to‘purarlar poygasida yetakchilik qilgan Temurxo‘ja Abduxoliqov va Osiyoning ikki karra eng yaxshi futbolchisi Server Jeparovga munosib o‘rinbosar topilgan yoki yo‘qligiga aniqlik kiritilmagan. “Lokomotiv” hozirga qadar Kot-d’Ivuardan bo‘lgan ikki futbolchini , shuningdek, “Nasaf”dan Shuhrat Muhammadiyev va “Olmaliq”dan Diyor Turopovni safga qo‘shib olgan .
Batafsil | Подробно | Read more... Daryo