Abdulaziz Kamilov O‘zbekiston va Yaponiya o‘rtasida diplomatik aloqalar o‘rnatilganining 25 yilligi munosabati bilan Fumio Kisidaga maktub yo‘lladi

O‘zbekiston Respublikasi tashqi ishlar vaziri Abdulaziz Kamilov Yaponiya tashqi ishlar vaziri Fumio Kisidaga ikki davlat o‘rtasida diplomatik aloqalar o‘rnatilganining 25 yilligi munosabati bilan maktub yo‘lladi. Bu haqda O‘zbekiston TIV matbuot xizmati xabar bermoqda .

Foto: “RIA Novosti”

Maktubda, jumladan, shunday deyiladi:
“Mamnuniyat bilan ta’kidlashni xohlardimki, o‘tgan davr mobaynida mamlakatlarimiz o‘rtasida ikki va ko‘p tomonlama munosabatlarning barcha jabhalari bo‘yicha 2002-yilda qabul qilingan Do‘stlik, strategik sheriklik va hamkorlik to‘g‘risidagi qo‘shma bayonot ruhida ochiq va samarali siyosiy muloqot o‘rnatildi.
2015-yilning oktabr oyida Yaponiya bosh vaziri janob Sindzo Abening O‘zbekistonga rasmiy tashrifining muvaffaqiyatli o‘tishi O‘zbekiston—Yaponiya munosabatlarining yuqori darajada ekanligini yana bir bor ko‘rsatdi hamda savdo-iqtisodiy, moliyaviy-investitsion, ilmiy-texnologik va madaniy-gumanitar sohalardagi hamkorlikni bundan buyon ham rivojlantirishga yangi sur’at baxsh etdi.
Mamlakatimiz iqtisodiyoti va ijtimoiy sohasini modernizatsiya qilishda, ishlab chiqarish quvvatlarini shakllantirishda, energetika, infratuzilma, telekommunikatsiya va boshqa yo‘nalishlarni rivojlantirish bo‘yicha yirik loyihalarni amalga oshirishda Yaponiya tomonidan ko‘rsatilayotgan yordamni yuqori baholaymiz.
Madaniy-gumanitar sohadagi aloqalar izchil rivojlanmoqda va mustahkamlanmoqda. O‘zbekiston tomoni hamkorlikni, ayniqsa ta’lim, sog‘liqni saqlash va turizm sohalarida aloqalarni kengaytirishga qiziqish bildiradi.
Bugun qat’iy ishonch bilan aytish mumkinki, Yaponiya O‘zbekistonning sinalgan do‘sti va ishonchli hamkoriga aylandi”.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ” ( @toshqindaryo )ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo