Xorazmda Rossiyaning yetakchi tibbiyot muassasalari ishtirokida ikkita klinika tashkil etiladi

O‘zbekiston Prezidenti Shavkat Mirziyoyev 27—28-yanvar kunlari Xorazm viloyatida bo‘ldi, deya xabar bermoqda O‘zA.

Foto: O‘zA

Prezident Xorazm viloyatiga tashrifining ikkinchi kuni Respublika ixtisoslashtirilgan kardiologiya markazining Xorazm filiali bilan tanishdi.
Ushbu tibbiyot maskani negizida Rossiyaning A.Bakulev nomidagi yurak-qon tomir jarrohligi ilmiy-amaliy markazi filialini tashkil etish rejalashtirilmoqda.
Bu chaqaloqlarda uchraydigan yurak nuqsonlarini aniqlash va davolash, yiliga 3 mingdan ziyod bemorga ixtisoslashgan tibbiy yordam ko‘rsatishga imkoniyat yaratadi.
Mazkur shifoxona Qoraqalpog‘iston Respublikasi, Xorazm, Buxoro viloyatlari aholisi uchun mintaqaviy markaz bo‘ladi.
Sog‘liqni saqlash tizimining birlamchi bo‘g‘inini rivojlantirish, o‘quv yurtlarida qishloq vrachlik punktlariga ixtisoslashgan mutaxassislar tayyorlash, kasalliklarni erta aniqlashga erishish, profilaktika ishlarini kuchaytirish, aholining tibbiy madaniyatini oshirish dolzarb masalalar hisoblanadi. Bunday markazlar bemorlarni davolash bilan birga ana shu ishlarga ham salmoqli hissa qo‘shishi kerak
Shavkat Mirziyoyev, O‘zbekiston Prezidenti
1100 ga yaqin talaba ta’lim olayotgan Toshkent tibbiyot akademiyasining Urganch filiali negizida I.Pavlov nomidagi Birinchi Sankt-Peterburg davlat tibbiyot universiteti bilan hamkorlikda klinika tashkil etilmoqda.
Unda endokrinologiya, otoloringologiya, gematologiya, allergologiya, terapiya bo‘limlari ochiladi. Universitet olim va shifokorlari bu yerda dars beradi, diagnostika ishlarini olib boradi va davolaydi. Talabalar klinikada zamonaviy davolash usullarini chuqurroq o‘rganadi.
Shavkat Mirziyoyev Respublika ixtisoslashtirilgan kardiologiya markazining Xorazm filiali va Toshkent tibbiyot akademiyasining Urganch filialida tashkil etiladigan bu ikki muassasa Orolbo‘yi aholisi uchun tarixiy va ijtimoiy ahamiyatga ega ekanini alohida ta’kidladi.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ” ( @toshqindaryo )ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo