Legioner.uz. Odil Ahmedov “Shanxay SIPG”dagi rasmiy debyutini 7-fevralda o‘tkazadi, Qirg‘izistonga ketgan Alisher Azizov turkman klubiga gol urdi

Odil Ahmedov
O‘zbekiston milliy terma jamoasi sardori Odil Ahmedov “Shanxay SIPG” safidagi ilk rasmiy uchrashuvini 7-fevral kuni o‘tkazadi. Kecha — 31-yanvar kuni Osiyo Chempionlar ligasining o‘tish bosqichi o‘yinlari o‘tkazilgach, shanxayliklarning rasmiy o‘yinlardagi ilk raqibi nomi aniq bo‘ldi.

Foto: Twitter / @TheAFCCL

Bu yo‘lda Tailandning “Sukxotai” jamoasi o‘z uyida Myanmaning “Yadanarbon” klubini qabul qildi va 5:0 hisobida zafar quchdi. Endi taylar Chempionlar ligasining guruh bosqichi masalasini hal qilish uchun “Shanxay SIPG” bilan pley-off o‘yinida ishtirok etadi.

Foto: “Championat.asia”

Xitoy Super ligasining yangi qoidalaridan farqli o‘laroq OFKda legionerlarning 3+1 kvotasi amal qilmoqda. Unga ko‘ra, Andre Villash Boash qo‘li ostida mashg‘ulot olib borayotgan besh nafar legionerning to‘rttasidan foydalanishi mumkin. Sharti — ulardan biri osiyolik bo‘lishi kerak. Ahmedov esa bu talabga juda mos tushadi. Shundan kelib chiqib, o‘zbekistonlik yarim himoyachi “Shanxay SIPG”dagi rasmiy debyutini katta ehtimol bilan 7-fevral kuni o‘tkazadi.

Foto: Rusfootball.info

Alisher Azizov
Qirzig‘istonning “Dordoy” klubi sharafini himoya qilayotgan o‘zbekistonlik futbolchi Alisher Azizov nufuzi jihatdan qit’ada Chempionlar ligasidan keyin ikkinchi o‘rinda turuvchi klublar musobaqasi — OFK kubogida gol urishga muvaffaq bo‘ldi.

Foto: “Gazeta.kg”

“Dordoy” Osh shahrida Turkmanistonning “Bolqon” klubini qabul qildi. Uchrashuvda hisob 69-daqiqada turkmanlar tomonidan ochilgan bo‘lsa, 78-daqiqaga kelib Alisher Azizov 8 ming muxlis kuzatib borayotgan o‘yinda “Dordoy”ni mag‘lubiyatdan qutqarib qoldi.
O‘tish bosqichi doirasidagi to‘qnashuvning javob bahsi 7-fevral kuni Turkmanistonda bo‘lib o‘tadi.
OFK kubogi
O‘tish bosqichi
31-yanvar, seshanba
“Dordoy” (Qirg‘iziston) — “Bolqon” (Turkmaniston) 1:1
Gollar: Nurtagan Mamedaliyev, 69 (0:1). Alisher Azizov, 78 (1:1).
Batafsil | Подробно | Read more... Daryo