Janubiy Koreya — O‘zbekiston 1:1. Devis kubogida Denis Istomin terma jamoaga birinchi ochkoni taqdim etdi

Tennis bo‘yicha norasmiy jahon chempionati hisoblangan Devis kubogining Osiyo va Okeaniya mintaqasida O‘zbekiston terma jamoasi Janubiy Koreya bilan to‘qnash kelishi kerak edi. Bugun — 3-fevral kuni uning doirasida ikki o‘yin bo‘lib o‘tdi va o‘zbekistonliklarning ikki eng kuchli tennischisi o‘z ishtirokini boshladi.
Birinchi bo‘lib kortga mamlakatning ikkinchi raketkasi Sanjar Fayziyev chiqdi. U jahon tennis reytingida 367-o‘rindan joy olgan bo‘lsa, Fayziyevga raqiblik qilgan Xyon Chon 73-o‘rinda edi. Ya’ni, Denis Istomindan ham uch pog‘ona yuqori . Bu holat natijada ham ko‘rindi. Tennischilarning o‘zaro o‘yinida koreyalik sportchining qo‘li baland keldi. Besh set davom etgan geymning 2 ta setida zafar quchish Fayziyevning g‘alabasi uchun yetarli bo‘lmadi — 4:6, 4:6, 7:6, 6:4, 0:6.
Australian open—2017 da muvaffaqiyatli ishtirok etib, jahonning ikkinchi raketkasi Novak Jokovichni sensatsion tarzda turnirdan chiqarib yuborgan O‘zbekistonning birinchi raqamli tennischisi Denis Istomin esa Fayziyevdan keyingi geymda zafar quchib, O‘zbekiston termasiga 1 ochko taqdim etdi. U mezbonlarning Dak Xi Li ismli tennischisiga qarshi kortga tushdi va birinchi setni kutilmaganda boy bergandi — 4:6. Keyingi uch set davomida esa raqibidan ustun keldi — 6:2, 7:6, 6:4.
Devis kubogi
Osiyo va Okeaniya mintaqasi
3-fevral, juma
Janubiy Koreya — O‘zbekiston 1:1
Xyon Chon — Sanjar Fayziyev 6:4, 6:4, 6:7, 4:6, 6:0
Dak Xi Li — Denis Istomin 6:4, 2:6, 6:7, 4:6
Ertaga — 4-fevral kuni juftlik bellashuvlari bo‘lib o‘tadi. 5-fevral kuni o‘tkaziladigan yakkalik bahslari bilan Janubiy Koreya — O‘zbekiston o‘yinida g‘olib nomi aniqlanadi.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ” ( @toshqindaryo )ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo