Yaman prezidenti Adanda terrorchilikka qarshi kurash bo‘yicha maxsus bo‘linma tuzish haqida ko‘rsatma berdi

Yaman prezidenti Abd Rabbu Mansur Hodiy mamlakatning muvaqqat poytaxti Adanda terrorchilikka qarshi kurash bo‘yicha maxsus brigada tuzish haqida ko‘rsatma berdi. Bu haqda, Al Arabiya telekanaliga asoslanib, “TASS” xabar bermoqda .

Foto: Good New Today

Qayd etishlaricha, Mansur Hodiy mazkur qarorni Yaman hukumatining “mamlakat janubiy hududlari “Ansorulloh” shia harakati (xusiylar)ning harbiylashgan tuzilmalaridan ozod qilinganidan so‘ng yangi xavfsizlik kuchlarini tashkil etish”ga qaratilgan dasturi doirasida qabul qilgan.
8-oktabr kuni Adanda terrorchilik bo‘yicha ishlarni ham ko‘rib chiqish vakolatiga ega Yaman jinoyat ishlari sudi kotibi Abbos al-Akribiy o‘ldirib ketilgandi. Bundan ikki kun avval esa Adanga qarata, xususan, “Al-Qasr” mehmonxonasiga joylashgan Yaman hukumati qarorgohi tomon uchta raketa uchirilgan.
Raketa zarbalari oqibatida 15 kishi, jumladan, arab koalitsiya tarkibiga kirgan mamlakatlarning to‘rt harbiy xizmatchisi halok bo‘lgandi, o‘nlab kishilar tan jarohati olgan. Yaman hukumati mazkur hujumda xusiylarni ayblab chiqdi, biroq Adan va mehmonxonaga uyushtirilgan hujum uchun mas’uliyatni “Iroq va Shom islom davlati” o‘ziga oldi.
Avgust oyi o‘rtalarida Yaman hukumati Adan shahri “Ansorulloh” harakati bo‘linmalaridan ozod qilinganini e’lon qilgandi. Sentabr oyida bosh vazir Xolid Baxax va uning hukumatidagi bir necha vazir Saudiya Arabistonidan Adanga yetib keldi. Arab koalitsiyasining rasmiy vakili, Saudiya Arabistoni armiyasi generali Ahmad Asiriyning qayd etishicha, “Yamanning 75 foiz hududi rasmiy hukumat nazorati ostiga qaytgan bo‘lsa-da, xavfsizlik sohasidagi nazorat hali to‘la tiklanganicha yo‘q”.
Batafsil | Подробно | Read more... Daryo