Afg‘oniston rahbari Qunduzdagi kasalxonaga qilingan aviahujum yuzasidan surishtiruv olib borish haqida topshiriq berdi

Afg‘oniston prezidenti Ashraf G‘ani tergovchilar guruhiga Qunduz shahrining toliblar tomonidan egallab olinishi va “Chegara bilmas shifokorlar” tashkiloti kasalxonasining AQSh Harbiy-havo kuchlari tomonidan aviahujumga uchrashi yuzasidan surishtiruv ishlari olib borish haqida topshiriq berdi. Bu haqda “RBK” xabar beradi .

Foto: “Polit.ru”

Prezident topshirig‘iga binoan, besh nafar mutaxassisdan iborat guruh yaqin kunlar ichida qanday qilib “Tolibon” harakati 28-sentabr kuni Qunduz shahrini qo‘lga olib, uni bir necha kun davomida egallab turishga muvaffaq bo‘lganligini aniqlashi zarur.
Bundan tashqari, guruh 3-oktabr kuni Qunduzda “Chegara bilmas shifokorlar” tashkilotining kasalxonasi AQSh Harbiy-havo kuchlari tomonidan aviahujumga uchraganlik holatiga ham aniqlik kiritishi lozim. Milliy razvedkaning sobiq rahbari Amrulla Saleh guruhga rahbarlik qiladi, surishtiruv natijalari bo‘yicha hisobot Afg‘oniston prezidentiga taqdim etiladi.
Eslatib o‘tamiz, AQSh prezidenti Barak Obama Qunduz shahridagi kasalxona aviazarbaga uchragani yuzasidan “Chegara bilmas shifokorlar” tashkiloti prezidenti Joanna Lyudan shaxsan kechirim so‘ragan edi .
Batafsil | Подробно | Read more... Daryo