Angela Merkel muhojirlar bilan bog‘liq vaziyat tufayli Germaniyada soliqlar oshirilmasligini ma’lum qildi

Germaniya kansleri Angela Merkel Yevroittifoqqa kelayotgan muhojirlar oqimi haddan ziyod ko‘payganligi munosabati bilan mamlakatda soliqlar oshirilmasligini ma’lum qildi. Bu haqda u Bild nashriga bergan intervyusida aytib o‘tgan, deya xabar beradi “Kommersant.ru”.

Foto: Bild

“Muhojirlar bilan bog‘liq vaziyat tufayli Germaniyada soliqlar oshirilmasligini va’da qilasizmi?” degan savolga Merkel “Ha, bunday bo‘lmaydi. Ko‘p yillar davomida iqtisodimiz yaxshi boshqarib kelingan, ayni paytdagi iqtisodiy holatdan ham ko‘nglimiz to‘q”, deb javob bergan.
Eslatib o‘tamiz, Yevropa Ittifoqi qochoq deya tan olinmagan Afrika va Yaqin Sharqdan kelgan muhojirlarni vatanlariga qaytarish uchun bu hududdagi mamlakatlarga bosim o‘tkazish yo‘llarini qidirmoqda. The Times ma’lumotlariga ko‘ra, yaqin haftalarda YeI rasmiylari boshpana berish rad etilgan 400 ming nafar muhojirni qaytarib yuborishni rejalashtirmoqda. Agar ularni qabul qilishda muammolar tug‘ilsa, YeI ushbu mamlakatlarga iqtisodiy yordam berishdan bosh tortishi hamda savdo va viza kelishuvlarini bekor qilishi mumkinligi bilan po‘pisa qilmoqda.
Batafsil | Подробно | Read more... Daryo