Niderlandiyalik tergovchilar “Boing” qulagan joydan samolyot bo‘laklari yo‘qolib qolganini ma’lum qildi

Donetsk yaqinidagi “Boing” qulagan joydan “samolyot korpusi va yukning bir qismi” yo‘qolgan, deyiladi Niderlandiya Xavfsizlik kengashi taqdim etgan aviahalokat haqidagi ma’ruzada. Bu haqda Meduza xabar bermoqda .

Foto: VNews

Bundan tashqari, The Guardian yozishicha, tergovchilar layner bort uskunalarining ba’zi detallari yo‘qolib qolganini ma’lum qilgan.
Ma’ruzada aytilishicha, ushbu buyumlar halokatdan so‘ng darhol olingan fotosurat va videoyozuvlarda aks etgan, biroq tergovchilar ishga kirishgan paytgacha ular o‘z joyidan yo‘qolib bo‘lgan.
Eslatib o‘tamiz, 13-oktabr kuni Niderlandiya xavfsizlik kengashi rahbari Chibbe Yaustra matbuot anjumani vaqtida Ukrainada halokatga uchragan Boeing yo‘lovchi samolyoti “Buk” zenit-raketa majmuasi yordamida urib tushirilganini ma’lum qildi .
Ukraina prezidenti Pyotr Poroshenko esa Niderlandiya bosh vaziri Mark Ryutte bilan telefon orqali suhbatlashib, “Boing” halokati aybdorlarini jazoga tortish bo‘yicha choralarni kelishib oldi .
“Boing-777” samolyoti Donbassda 2014-yilning 17-iyulida qulab tushgan edi. Halokat oqibatida 298 kishi qurbon bo‘lgan.
Batafsil | Подробно | Read more... Daryo