Janubiy Koreya konsorsiumi O‘zbekistondagi gaz-kimyo majmuasi qurilishini yakunladi

Janubiy Koreya kompaniyalari konsorsiumi Ustyurt gaz-kimyo majmuasi (GKM) qurilishini yakunladi. Bu haqda, “Gazeta.uz”ning xabar berishicha , konsorsium tarkibidan o‘rin olgan Lotte Chemical kompaniyasi prezidenti Xa Su Yang ma’lum qildi.

Foto: “Gazeta.uz”

“GKM qurilishining yakunlanishi Janubiy Koreya va O‘zbekiston hukumatlari hamda xususiy kompaniyalari o‘rtasidagi yaqin hamkorlik samarasidir”, — deydi Xa Su Yang. Uning so‘zlariga ko‘ra, GKM 2016-yil yanvaridan mahsulot ishlab chiqarishga kirishadi, uning mahsulotlari Markaziy Osiyo mamlakatlari, Rossiya, Yevropa va Shimoliy Afrikaga eksport qilinadi.
“O‘zbekneftgaz” milliy xolding kompaniyasi Qoraqalpog‘istondagi Surgil koni negizida Ustyurt GKM qurilishi uchun Kor-Uz Gas Chemical Investment konsorsiumi bilan birgalikda Uz-Kor Gas Chemical qo‘shma korxonasini tashkil etgandi. Koreya kompaniyalari konsorsiumi tarkibida hozirgi vaqtda Kogas, Lotte va STX Energy bor.
Qurilishi 2012-yili boshlangan GKM har yili 4,5 milliard metr kub tabiiy gazni qayta ishlaydi va 4 milliard metr kub tovar gazi, turli qalinlikdagi 400 ming tonna polietilen, 100 ming tonni polipropilen va 100 ming tonnaga yaqin piroliz benzin ishlab chiqaradi. Loyihaning bosh pudratchisi sifatida Samsung Engineering, GS Engineering va Hyundai Engineering ishtirok etdi.
Umumiy qiymati 4,16 milliard dollarga teng loyiha xorijiy moliya institutlari konsorsiumlarining 2,5 milliard dollar miqdoridagi kreditlari, Uz-Kor Gas Chemical qo‘shma korxonasi ta’sischilarining 1,41 milliard dollar miqdoridagi o‘z mablag‘lari, shuningdek, O‘zbekiston Tiklanish va taraqqiyot jamg‘armasining 100 million dollar miqdoridagi krediti hisobidan moliyalashtirildi.
Batafsil | Подробно | Read more... Daryo