Vengriya Xorvatiya bilan chegarasini muhojirlar uchun yopdi

Vengriya muhojirlar oqimini to‘xtatish maqsadida Xorvatiya bilan chegarani yopdi. Bu haqda, Vengriya hukumati bayonotiga asoslanib, “Yevropeyskaya pravda” xabar bermoqda .

Foto: “RBK”

“16-oktabr, juma kuni yarim tunda Vengriya—Xorvatiya chegarasi yopildi va bu yerda avvalroq Vengriya—Serbiya chegarasida qo‘llanilishi boshlangan nazorat usullari joriy etildi”, — deyiladi hukumat axborotida.
Chegara yopilganidan so‘ng qochoqlar ikkita chegara tranzit zonasida boshpana taqdim etishni so‘rab, iltimosnoma taqdim etishi mumkin.
Vengriya hukumati vakillarining qayd etishicha, mamlakatga Vengriya—Xorvatiya chegarasi orqali qonuniy yo‘l bilan kirish imkoniyati saqlab qolingan.
Vengriya bosh vaziri Viktor Orban Yevropa Ittifoqidan Gretsiya—Turkiya chegarasini yopishni talab qilgan, aks holda Vengriya Xorvatiya bilan chegarasini yopishini ma’lum qilgandi.
Avvalroq Vengriya Serbiya bilan chegaraga devor o‘rnatishni boshlagandi, mamlakatning bu harakati xalqaro hamkorlar tomonidan tanqid ostiga olingandi.
Mazkur chora oqibatida Serbiyadan Vengriyaga kelayotgan muhojirlar oqimi sezilarli kamaydi, biroq, ayni vaqtda, Xorvatiyadan kelayotgan muhojirlar soni ko‘payib ketdi.
Batafsil | Подробно | Read more... Daryo