Harbiy pensionerlar kollej va litseylarga alohida tartibda ishga qabul qilinadi

O‘zbekiston Respublikasi Mudofaa vazirligi, Mehnat vazirligi, Moliya vazirligi hamda Oliy va o‘rta maxsus ta’lim vazirligining O‘rta maxsus, kasb-hunar ta’limi markazi qarori ( pdf ) bilan Harbiy xizmatchilar orasidan pensionerlarni harbiy-akademik litseylar, shuningdek akademik litseylar va kasb-hunar kollejlariga ishga qabul qilish tartibi to‘g‘risidagi nizom tasdiqlandi, deb yozadi Norma.

Foto: “Buxdu.uz”

Harbiy akademik litseylarning bo‘sh (vakant) direktorlari, ularning o‘rinbosarlari va o‘qituvchilari lavozimlariga ishga qabul qilish
Tegishli ma’lumotga, kasbiy tayyorgarlikka va yuksak axloqiy sifatlarga ega bo‘lgan shaxslar harbiy-akademik litseyda pedagogik faoliyat bilan shug‘ullanish huquqiga ega.
Pensionerlar harbiy-akademik litseylarning bo‘sh (vakant) direktori lavozimlariga O‘zbekiston Respublikasi Prezidentining 2005-yil 28-fevraldagi F-2146-son farmoyishi bilan tasdiqlangan Akademik litsey va kasb-hunar kollejlarining direktorlarini tanlash va tayinlash tartibi to‘g‘risidagi nizomda, harbiy akademik litseylarning bo‘sh (vakant) direktori o‘rinbosarlari, o‘qituvchilari lavozimlariga esa, O‘rta maxsus, kasb-hunar ta’limi muassasalari direktor o‘rinbosarlari, pedagog va muhandis-pedagoglarning bo‘sh lavozimlarni egallash uchun ularni tanlov asosida tanlab olish to‘g‘risidagi nizomda (ro‘yxat raqami 1461, 2005-yil 28-mart) belgilangan tartibda tanlab olinadi.
Harbiy-akademik litseylarning bo‘sh (vakant) direktori lavozimlariga tanlovda ishtirok etish xohishini bildirgan pensionerlar tanlov e’lon qilingan kundan e’tiboran bir oy muddat ichida hududiy o‘rta maxsus, kasb-hunar ta’limi boshqarmasiga quyidagi hujjatlarni topshirishi lozim:

ariza;
pasport nusxasi;
pensiya guvohnomasi nusxasi;
O‘zbekiston Respublikasi Qurolli Kuchlari rezervidagi harbiy xizmatchining guvohnomasi;
belgilangan shaklda to‘ldirilgan so‘rovnoma;
tarjimai hol;
oliy ma’lumot to‘g‘risidagi diplomining nusxasi;
mehnat daftarchasi (mavjud bo‘lsa).

Harbiy-akademik litsey direktori O‘zbekiston Respublikasi Mudofaa vaziri bilan kelishilgan holda Oliy va o‘rta maxsus ta’lim vaziri tomonidan qonun hujjatlarida belgilangan tartibda lavozimga tayinlanadi.
Harbiy-akademik litseylar direktorlarining o‘quv, ma’naviy-ma’rifiy va ma’muriy-xo‘jalik ishlari bo‘yicha o‘rinbosarlari hamda o‘qituvchilari O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi bilan kelishilgan holda harbiy akademik litsey direktori tomonidan lavozimga tayinlanadi.
Pensionerlarni harbiy-akademik litseylar direktorlarining o‘quv, ma’naviy-ma’rifiy va ma’muriy-xo‘jalik ishlari bo‘yicha o‘rinbosarlari yoki o‘qituvchilari lavozimiga tayinlashda ular haqda tegishli tuman (shahar) mudofaa ishlari bo‘limining fikri olinadi.
Akademik litseylar va kasb-hunar kollejlarining chaqiruvga qadar boshlang‘ich tayyorgarlik fani rahbari lavozimlariga ishga qabul qilish
O‘rta maxsus, kasb-hunar ta’limi muassasalarining chaqiruvga qadar boshlang‘ich tayyorgarlik fani rahbari lavozimiga oliy ma’lumotli, kasbiy jihatdan yaxshi tayyorlangan hamda yuqori tajriba va malakaga ega bo‘lgan pensionerlar tayinlanadi.
Pensionerlar akademik litseylar va kasb-hunar kollejlarining chaqiruvga qadar boshlang‘ich tayyorgarlik fani rahbari lavozimlariga Vazirlar Mahkamasining 2014-yil 18-dekabrdagi 348-son qarori bilan tasdiqlangan Chaqiruvga qadar boshlang‘ich tayyorgarlikni tashkil etish va uni amalga oshirish tartibi to‘g‘risidagi nizomda belgilangan tartibda tanlab olinadi.
O‘rta maxsus, kasb-hunar ta’limi muassasalarining chaqiruvga qadar boshlang‘ich tayyorgarlik fani rahbari lavozimga tegishli tuman (shahar) mudofaa ishlari bo‘limi bilan kelishilgan holda akademik litsey yoki kasb-hunar kolleji direktori tomonidan lavozimga tayinlanadi.
Batafsil | Подробно | Read more... Daryo