Qozog‘istonlik bokschi Gennadiy Golovkin uch yo‘nalish bo‘yicha jahon chempioni unvonlarini o‘zida jamladi

Qozog‘istonlik Gennadiy Golovkin 72,6 kilogrammgacha bo‘lgan vaznda Butunjahon boks assotsiatsiyasi (WBA), Butunjahon boks kengashi (WBC) kamarlarini himoya qilib va Xalqaro boks federatsiyasi (IBF) kamarini qo‘lga kiritib, uch yo‘nalish bo‘yicha chempionlik unvonlarini o‘zida jamladi. Nyu-Yorkda bo‘lib o‘tgan 12 raundli jangda u IBF yo‘nalishidagi avvalgi chempion, kanadalik David Lemye ustidan 8-raundda texnik nokaut bilan g‘alaba qozondi. Bu haqda “TASS”  xabar bermoqda .

Foto: “NTV”

Bellashuv Golovkinning katta ustunligi bilan o‘tdi. Beshinchi raund oxirida tomoshabinlar birinchi nokdaunga guvoh bo‘ldi, biroq Lemye qiyinchilik bilan bo‘lsa-da, jangni davom ettirishga o‘zida kuch topdi. Hakam 7-raundda burnidan qon ketayotgan kanadalikning oldiga shifokorni chaqirdi. 8-raundda, Lemye raqib hujumlariga javob bermay qo‘ygach, referi jangni to‘xtatdi.
Golovkin 15-marta WBA, uchinchi marta WBC kamarini himoya qildi va Lemyedan IBF chempionligini tortib oldi. 33 yoshli qozog‘istonlik hozirgacha mag‘lubiyat nimaligini bilmayapti: uning hisobida jami 34 ta g‘alaba bor (ulardan 31 tasi nokaut bilan). Lemye bilan jang uchun unga 2 million dollar berilishi kafolatlangan.
Batafsil | Подробно | Read more... Daryo