Toshkent xalqaro aeroporti dunyoning eng yomon aeroportlari reytingida 4-o‘ringa ko‘tarildi

The Guide to Sleeping in Airports (“Aeroportlarda uxlash bo‘yicha yo‘riqnoma”) internet-resursi Toshkent xalqaro aeroportini jahonning eng yomon to‘rtinchi aeroporti deb topdi. Bu haqda The Telegraph nashri xabar bermoqda .

Foto: The Guide to Sleeping in Airports

Sayt o‘z ma’lumotlarini aeroportlarda bo‘lgan yo‘lovchilarning fikrlari asosida shakllantiradi, jahon aeroportlarini yaxshi va yomon deb topishda aeroport haqida foydalanuvchilar tomonidan qoldirilgan fikrlarga asoslanadi.
Toshkent xalqaro aeroporti uzundan-uzun navbatlar, betakalluf yo‘lovchilar va o‘rindiqlar yetishmasligi jihatidan tanqid qilindi. Sayohatchilardan biri qisqa qilib ta’riflashicha, aeroportda “qilinadigan eng asosiy ish kutishdan iborat”.
Reytingda Nigeriyadagi Port Xarkort xalqaro aeroporti yetakchilik qildi. Undan keyingi pog‘onalarni Saudiya Arabistonining Jidda shahridagi Qirol Abdulaziz xalqaro aeroporti, Nepal poytaxti Katmandudagi Tribxuvan xalqaro aeroporti egalladi. Venesuelaning Karakas shahridagi Simon Bolivar xalqaro aeroporti Toshkentdan bir pog‘ona orqada qoldi.
Kuchli o‘nlikdan, shuningdek, Tussen-Luvertyur (Gaiti), Hamid Karzay (Afg‘oniston), Tan Son Nxat (Vyetnam), Benazir Bxutto (Pokiston), Bove-Till (Fransiya) aeroportlari o‘rin oldi.
Eslatib o‘tamiz, o‘tgan yili Toshkent xalqaro aeroporti jahonning eng yomon beshinchi aeroporti deb topilgan edi .
Batafsil | Подробно | Read more... Daryo