Samolyotda yonidagi odamni tishlab olgan portugaliyalikning tanasida shubhali konteynerlar topildi

Vahima xuruji vaqtida yonida o‘tirgan kishini tishlab olib, so‘ng vafot etgan “Lissabon – Dublin” aviareysi yo‘lovchisining tanasidan ichida noma’lum moddalar bo‘lgan konteynerlar chiqarib olindi. Bu haqda “RIA Novosti” xabar bermoqda .

Foto: “RIA Novosti”

Irlandiyaning RTE teleradiokorporatsiyasi xabariga ko‘ra, hodisa 19 oktabr, dushanba kuni mamlakatning eng yirik — Aer Lingus aviakompaniyasi reysi vaqtida yuz bergan.
Ekipaj komandiri Kork xalqaro aeroportiga favqulodda qo‘nish uchun ruxsat so‘ragan. Vahimaga tushib, bortda janjal ko‘targan 24 yoshli portugaliyalik ko‘p o‘tmay hushini yo‘qotgan. Samolyot qo‘nganidan so‘ng yetib kelgan shifokorlar yo‘lovchining vafot etganini qayd etgan.
RTE ma’lumotlariga ko‘ra, ekspertlar tanani yorib ko‘rish vaqtida uning ichidan bir necha konteyner topgan, ularning kamida bittasi ochib ko‘rilgan. Hozirgi vaqtda konteynerlar sud ekspertizasiga yuborilgan.
Sud ekspertizasi va toksikologik test natijalari olinmasidan, portugaliyalik yo‘lovchi o‘limining aniq sabablarini aytib bo‘lmaydi.
Qonunbuzarlar odatda giyohvand moddalarni noqonuniy olib o‘tishda shunday yo‘ldan foydalanadi. Xususan, 2015 yilning iyun oyida 1,5 kilogramm kokainni o‘zining ko‘krak implantlarida olib o‘tishga uringan gonduraslik ayol Bogota aeroportida qo‘lga olingan edi.
Batafsil | Подробно | Read more... Daryo