Nike “Kelajakka qaytib” filmi aktyoriga bog‘ichlari o‘zi bog‘lanadigan krossovkani sovg‘a qildi

Sport poyabzallari va liboslari ishlab chiqaruvchi Nike kompaniyasi bog‘ichlari o‘zi bog‘lanadigan krossovkalarning ilk namunasini ushbu poyabzalning ekrandagi ilk egasi — “Kelajakka qaytib” filmida Marti Makflay rolini ijro etgan 54 yoshli aktyor Maykl Jey Foksga yubordi. Bu haqda “Interfaks” xabar bermoqda .

Foto: “Interfaks”

“Bugun Nike mazkur poyabzalning eng birinchi va eng mashhur egasiga yangi ishlanmani taqdim etib, Maykl Jey Foksga sovg‘ani eltdi”, — deyiladi Nike kompaniyasi tomonidan 21-oktabr, chorshanba kuni berilgan bayonotda.
Nike vakillarining ma’lum qilishicha, kompaniya tomonidan ishlab chiqilgan tizim poyabzal egasining harakatlaridan kelib chiqib bog‘ichlarning bog‘lanish darajasini tartibga solib turadi. Bog‘ichlari o‘zi bog‘lanadigan krossovkalar ommaviy sotuvga chiqishi va ommaviy sportda foydalanilishidan avval, qo‘shimcha sinovlardan o‘tkazilishi kerak.
21-oktabr, chorshanba kuniga o‘tar kechasi Nike kompaniyasining Twitter’dagi sahifasida 2015-yilning 21-oktabr kuni — rejissor Robert Zemekisning “Kelajakka qaytib” trilogiyasi bosh qahramoni vaqt mashinasida kelib qolgan kuni alohida sovg‘a bo‘lishi haqida xabar paydo bo‘lgandi. Kompaniya bosh rol ijrochisi Maykl Jey Foksga qarata: “Ertaga ko‘rishamiz”, — deb yozgandi.
Vaqtlararo sayohat haqidagi “Kelajakka qaytib” filmlarining birinchi qismi 1985-yili ekranlarga chiqqan. Filmni suratga olish ishlariga Stiven Spilberg prodyuser sifatida qatnashgan. Filmning ikkinchi qismi 1989-yili, uchinchisi esa 1990-yilda tomoshabinlar e’tiboriga havola qilingan.
Batafsil | Подробно | Read more... Daryo