BMT Xolokostda Falastin yetakchisining roli borligi haqidagi Netanyaxuning fikrlarini aqlga zid deb atadi

Isroil bosh vaziri Binyamin Netanyaxuning so‘zlariga ko‘ra, 1941-yili falastinliklar yetakchisi — Quddus muftiysi Haj Amin al-Husayniy natsistlar Germaniyasi dohiysi Adolf Gitlerni yahudiylarni qirishga ilhomlantirgan. Netanyaxuning bu so‘zlariga 21-oktabr, chorshanba kuni BMTda keskin munosabat bildirildi, deya xabar bermoqda “TASS”.

Foto: “TASS”

“Yahudiylarga nisbatan Xolokostni boshlashga [Gitlerni] falastinliklar, musulmonlar yoki natsistlardan boshqa birov ilhomlantirishi mumkinligi haqidagi barcha taxminlar aqlga sig‘maydi”, — dedi BMT bosh kotibi rasmiy vakili o‘rinbosari Farxan Haq. Uning so‘zlariga ko‘ra, bu kabi fikrlar “keskinlikni yumshatishga yordam bermaydi”.
Haqning qayd etishicha, BMT bosh kotibi Pan Gi Mun Isroil va Falastinga amalga oshirgan tashrifi chog‘ida “barcha siyosiy, jamoat va diniy yetakchilarni ig‘vogarliklarga qarshi chiqishga” chaqirgan edi. “BMT bosh kotibi bu da’vatni qaytarishda davom etadi”, — dedi xalqaro tashkilot vakili.
Netanyaxuning ko‘plab mamlakatlar jamoatchiligi tomonidan keskin kutib olingan fikrlari 20-oktabr, seshanba kuni Quddusda bo‘lib o‘tgan Sionistlarning 37-kongressi vaqtida yangragan edi.
“Al-Husayniy Berlinga uchib borgan. O‘sha vaqtda Gitler yahudiylarni qirish istagida bo‘lmagan, u faqat yahudiylarni quvg‘in qilmoqchi edi. Al-Husayniy esa Gitlerning yoniga borib: ‘Agar sen ularni haydasang, ular Falastinga keladi’, — degan. ‘Ularni nima qilishim kerak?’, — deb so‘ragan Gitler. Al-Husayniy shunday degan: ‘Ularni yoqib yubor’”.
Isroil bosh vazirining so‘zlarini uning hamyurtlari ham keskin kutib oldi. Xususan, muxolifatdagi “Sionistlar lageri” partiyasi rahbari Is’hoq Gersog bosh vazirdan “aytgan so‘zlarini zudlik bilan qaytarib olishni” talab qildi, hukmron “Likud” partiyasi bo‘yicha Netanyaxuning safdoshi hisoblangan Isroil mudofaa vaziri Moshe Yaalon tarixning bunday talqin qilinishini tanqid ostiga oldi. “Yahudiylar masalasini tugal hal qilish g‘oyasini al-Husayniy o‘ylab topmagan”, — dedi u.
Batafsil | Подробно | Read more... Daryo