Palov, somsa va lag‘mon: Moskvadagi o‘zbeklar qayerlarda ovqatlanadi?

Moskvada haqiqiy palovni topish mumkinmi? Qo‘y go‘shtidan tayyorlangan shashlikni qayerda tanovul qilish mumkin? Moskvada yashovchi o‘zbeklar haqiqiy o‘zbek taomi tayyorlanadigan qimmatbaho restoranlar, kafelar tarmog‘i va arzon tamaddixonalar haqida hikoya qiladi, deb yozadi  Afisha Daily.
“Shabada”
“Hissiyotlar bo‘yicha Toshkentga eng yaqin joy”

Foto: Afisha Daily

Oleg Abdurashitov, Kaspersky Lab xodimi: “O‘zbek oshxonasi deganda turli geografik va tarixiy shart-sharoitlarda joylashgan turli hududlar oshxonalarining uyg‘unligi nazarda tutiladi. Shuning uchun ham toshkentcha osh uning samarqandcha va farg‘onacha turlaridan sezilarli darajada farq qiladi.
Qadrdon Toshkentda osh, manti, somsa, shashlik va lag‘mon — bularning barchasi, birinchi navbatda stritfud bo‘lib, ular tongda xarid qilingan mahsulotlardan ko‘p miqdorda tayyorlab qo‘yiladi va shu zahoti iste’mol qilinadi. Moskvada esa iqlim o‘ziga xosliklari va mahsulot logistikasidan kelib chiqib bunga erishish qiyin, biroq oxirgi yillarda o‘zbek oshxonasi kabi muassasalar soni sezilarli darajada oshdi.
Moskvada hissiyotlar bo‘yicha Toshkentga eng yaqin joy — bu Selskoxozyaystvenniy ko‘chasidagi ‘Shabada’ restorani. Bu yerga yozning issiq oqshomlarida katta kompaniya bilan kelib, ko‘chadagi stolga joylashib, issiq non, somsa, achichuk salati va albatta osh buyurtma qilgan ma’qul.
O‘zbek oshxonasi haqiqiy slow food. Shoshilmang. Bahramand bo‘ling. Yana buyurtma qiling”.
“Vizir Maxallya & Graf Orlov”
“Men Moskvada yegan eng yaxshi osh”

Foto: Afisha Daily

Elya Krasik, Tashqi iqtisodiy faoliyat bo‘yicha menejer: “O‘ziga xos atmosferaga ega bo‘lgan ajoyib joyni tavsiya qilmoqchiman (tan olish kerakki, narxlar ancha yuqori) — ‘Vizir Maxallya & Graf Orlov” restorani. U graf Orlovning sobiq qo‘rg‘onidagi qadimiy va go‘zal binoda joylashgan.
Men Moskvada tanovul qilgan eng yaxshi osh — xuddi Toshkentdagi kabi bayramona. Uni laganda tortishadi, oshdagi guruch erib ketadi. Tandirda pishirilgan somsaning mazasi ham xuddi vatanimdagi kabi. Bu restorandagi ajoyib oshpazlarning barchasi o‘zbekistonlik”.

Foto: Afisha Daily

Timur Lanskiy, “Chayxona №1” restoranlari asoschisi: “Men Moskvada tug‘ilib, o‘sganman, otam esa asli toshkentlik. O‘zbek oshxonasi haqida eshitganimda birinchi navbatda urush davrlarida o‘zbeklar millionlab qochoqlarni ovqatlantirgan taomlar ko‘z oldimga keladi.
O‘zbek taomi men uchun birinchi navbatda mehmondo‘st va mehribon xalqning mazali taomidir. Choyxona taomlari Moskva va boshqa shaharlarimizda hech qachon yo‘qolmaydi. Faoliyatim turi tufayli restoranlarim konsepsiyasiga o‘xshash ko‘plab ovqatlanish muassasalariga borishimga to‘g‘ri keladi. ‘Vizir Maxallya & Graf Orlov’ restoranida yaxshi osh va manti tayyorlashadi. Yaxshi lag‘mon uchun esa Oxus’ga yo‘l olishni tavsiya qilaman”.
“Vostochniy kvartal”
“U yerga doim do‘stlarimizni olib boramiz”

Foto: Afisha Daily

Alisher, qo‘shiqchi, dizayner: “Men uchun Moskvada eng mazali, ishonchli va to‘g‘ri osh, yana haqiqiy o‘zbek shashligini tayyorlaydigan bitta joy bor. Bu stariy Arbatdagi ‘Vostochniy kvartal’ kafesidir. Uni 20 yil avval asli toshkentlik rus bolalar ochgan. Bu Moskvada paydo bo‘lgan birinchi o‘zbek oshxonasi kafelaridandir.
Kafeda qo‘ydan tashqari barcha mahsulotlar O‘zbekistondan keltiriladi. Kafe egalari ularning kafesi 20 yildan buyon bir kun ham yopilmaganligi bilan faxrlanadi”.
“Pavlin-mavlin”
“Qo‘y go‘shtidan tayyorlangan o‘zbekcha pelmeni — chuchvarani tatib ko‘rishni tavsiya qilaman”

Foto: Afisha Daily

Sergey Komarov, “Sobaka Records” boshqaruv direktori: “O‘zbek taomi bu bir olam an’analar majmuasi. Moskvada o‘zbek restoranlari juda ko‘p. Ulardan ‘Pavlin-mavlin’ni tanladim.
Menga ularning lag‘moni juda yoqadi, uning ta’mi haqiqiy o‘zbekchasini eslatadi. Shunindek, kichkina o‘zbekcha pelmeni — chuchvarani tatib ko‘rishni tavsiya etaman”.
“Alayskiy bazar”

Foto: Afisha Daily

Sofya Nazmetdinova, GR-konsultant: “Men uchun o‘zbek taomi tanish, yaqin va qadrdon. Anchadan buyon O‘zbekistonda yashamayman, milliy taomlar esa qadrdon joylar bilan aloqani saqlash imkonini beradi. ‘Lagmannaya’ kafesida ajoyib kulcha va somsa sotiladi.
Kattaroq muassasalarda norin kabi noyob taomni tatib ko‘rish mumkin. ‘Alayskiy bazar’ ana shunday muassasalardan biridir”.
“Uzbekistan”
“Ajoyib oshxona va benuqson xizmat ko‘rsatiladigan restoran”

Foto: Afisha Daily

Doni, Black Star leybli artisti: “Albatta Moskvaning hech qayerida O‘zbekistondagi kabi taom tayyorlanmaydi. Birinchidan, mahsulotlar boshqacha. Ikkinchidan, o‘zbek oshxonasi bu oddiy taomlar emas, butun bir an’analar majmuasidir. O‘zbek milliy taomlarini tanovul qilish uchun ‘Uzbekistan’ restoraniga boraman. U yerda dasturxonning bosh taomi — palov va shirinliklarni tatib ko‘rishingiz mumkin”.
Uyga yetkaziladigan taom: Plov Time, Ploveberry va Plov.com
“Chiroyli va qulay qadoqdagi o‘zbek taomi”

Foto: Afisha Daily

Xabib Abdullayev, Moskvada o‘zbek milliy-madaniy avtonomiyasi raisi: “O‘zbek taomlarini uyga yoki ofisga buyurtma qilish uchun Moskvada bir nechta servislar mavjud. Ulardan Plov Time’ni maqul ko‘raman. Ayniqsa ularning ‘Bayramona’ palovi (unga sariq no‘xat va mayiz qo‘shiladi), shuningdek, somsa va qovoq mantisini yoqtiraman”.
“Uryuk”

Foto: Afisha Daily

Mariya Buglova, menejer: “Lag‘mon va norinni ‘Uryuk’ choyxonalaridan olish kerak. Uch-panja (qo‘y go‘shtidan shashlik) va somsani esa ‘Chayxona №1’ dan, kulchani Danilovskiy bozori qarshisidagi palatkadan olishni tavsiya qilaman. Danilovskiy bozorining o‘zidan esa qurt ham topish mumkin”.
“Daryo”ning YouTube’dagi rasmiy sahifasiga obuna bo‘ling
a.social-link-block:hover{color: white !important; text-decoration: none !important;} a.social-link-block{display: block;color: white !important;clear: both;background: #e62d28;position: relative;padding: 5px 20px 5px 45px; text-decoration: none !important;line-height: 40px;font-size: 17px;}.social-link-block:before{background-image: url(/wp-content/static/icons/youtube.jpg); width: 40px; height: 40px; content: ""; display: inline-block; background-size: 40px 40px; background-position-y: 3px; background-repeat: no-repeat; position: absolute; left: 0; top: 50%; margin-top: -25px;}@media(max-width: 767px) {a.social-link-block{line-height: 25px;}}
The post Palov, somsa va lag‘mon: Moskvadagi o‘zbeklar qayerlarda ovqatlanadi? appeared first on Daryo .
Batafsil | Подробно | Read more... Daryo