“Bemor vafot etgan emasdi, u tirik bo‘lgan”. Sog‘liqni saqlash vazirligi qashqadaryolik Muhammadjonning holati bo‘yicha axborot berdi

O‘zbekiston Sog‘liqni saqlash vazirligi matbuot xizmati bemor Muhammadjon Rashidovning holati yuzasidan Qashqadaryo viloyat sog‘liqni saqlash boshqarmasi boshlig‘i To‘lqin Rasulovning axborotini e’lon qildi. Axborot matni vazirlik saytida 7-iyul kuni chop etildi .
Avvalroq 14-may kuni tug‘ilgan Muhammadjon Rashidovning buvisi Nargiza Qurbonova shifokorlar unga nevarasini 28-iyundagi operatsiyadan so‘ng “vafot etdi”, deb topshirgani, biroq chaqaloq janozasi vaqtida “jonlangani” haqida ma’lum qilgan edi .

Mavzuga doir: Mayit yuvuvchining qo‘lida “jonlangan” bir yarim oylik go‘dak. Qashqadaryolik Muhammadjonning hayoti saqlab qolinadimi?

Qashqadaryo viloyat sog‘liqni saqlash boshqarmasi boshlig‘i To‘lqin Rasulovning axborotida ta’kidlanishicha, “bemor uyga olib ketilayotganida vafot etgan emasdi, u tirik bo‘lgan”. Qo‘shimcha qilishlaricha, bemorning buvisi chaqaloqni olib ketayotganida bu haqda tilxat ham yozib bergan.
To‘lqin Rasulov taqdim etgan axborotning to‘liq matni bilan quyida tanishish mumkin:
Bemor Rashidov Muhammad 2017-yil 14-may kuni tug‘ilgan. Viloyat bolalar ko‘p tarmoqli tibbiyot markaziga shu yilning 10-iyun kuni “Markaziy nerv tizimining perinatal zararlanishi. Chaqaloqlar gemolitik kasalligi. Homila ichi infeksiyasi” tashxisi bilan og‘ir ahvolda chaqaloqlar jonlantirish bo‘limiga qabul qilingan.
Shundan so‘ng barcha laborator va instrumental tekshiruvlar o‘tkazilgan. Reanimatsion va intensiv davo muolajalari qo‘llanilganiga qaramay, bemor ahvoli o‘ta og‘irligicha qolgan.
Oxirgi vaqtlarda bemorda qo‘shimcha ravishda qorin taranglashishi, dam bo‘lishi, qorinning kattalashishi, ich kelmasligi, tana haroratining ko‘tarilishi, qayt qilish kabi belgilar kuzatilgan. Shundan so‘ng bemor jarrohlar tomonidan qayta konsultatsiya qilingan va unga “Yarali nekrotik enterokolit, yo‘g‘on ichak stenozi, peritonit” tashxisi ham qo‘yilgan.
Bunday vaziyatda, albatta, operativ davo lozim bo‘ladi. Ammo Muhammad Rashidovning ahvoli og‘irligi bois, operatsiya katta xavf ostida qilinishi bemor yaqinlariga tushuntirilgan. 2017-yilning 28-iyun kuni bemor Muhammad Rashidovning onasi tilxat asosida operatsiyaga roziligini bildirgan. Shu kunning o‘zidayoq, ya’ni soat 15:30 dan bemor operatsiyaga tayyorlana boshlandi. Va soat 17:00 dan 18:50 gacha jarrohlik amaliyoti bajariladi.
Ushbu amaliyotdan so‘ng “Sepsis. Homila ichi infeksiyasi. Yarali nekrotik-gangrenoz total enterokolit. Yo‘g‘on ichaklar va ingichka ichak yaralarining perforatsiyasi. Tarqalgan najasli-yiringli-fibrinli peritonit. Endotoksikoz” tashxisi qo‘yiladi.
Shifokorlarning barcha amaliy choralarni ko‘rishiga qaramasdan, bemor ahvoli og‘ir bo‘lgan. Jarroh ushbu murakkab vaziyatni bemorning qarindoshlariga tushuntirgan. Shundan so‘ng bemorning buvisi bolani uyga olib ketmoqchi bo‘ladi. Shifokorlarning ruxsat bermasligiga qaramay, tilxat asosida 28-iyun kuni soat 19:30 da bemor Muhammad Rashidovni uyga olib ketgan.
Ta’kidlab o‘tish lozimki, bemor uyiga olib ketilayotganda ijtimoiy tarmoqlarda yozilganidek vafot etgan emasdi, u tirik bo‘lgan. Bu haqda bemorning buvisi tilxat ham yozgan. Bola vafot etgani haqidagi xulosa uning yaqinlari tomonidan qilingan va bu haqda tibbiyot xodimlariga xabar berilmagan.
Bemor shifoxonadan olib ketilgan kunning o‘zidayoq soat 22:30—23:00 larda viloyat bolalar ko‘p tarmoqli tibbiyot markazining reanimatsiya bo‘limiga uni yana qaytarib olib kelishgan va davo muolajalari davom ettirilgan.
4-iyul kuni Respublika shoshilinch tez tibbiy yordam ilmiy markazi bolalar jarrohi I.Karimov bemor Muhammad Rashidovning barcha tahlil natijalari va kasallik tarixi bilan tanishib, konsultatsiya qildi. I.Karimov tashxis to‘g‘ri qo‘yilgani va barcha muolajalar standart asosida olib borilganani qayd etib, qo‘shimcha tavsiyalar berdi.
Hozirgi vaqtda bemor jonlantirish bo‘limida. Davo muolajalari davom ettirilmoqda.
To‘lqin Rasulov, Qashqadaryo viloyat sog‘liqni saqlash boshqarmasi boshlig‘i
“Daryo”ning Telegram’dagi rasmiy kanali — @toshqindaryo’ga a’zo bo‘ling!
a.social-link-block:hover{color: white !important; text-decoration: none !important;} a.social-link-block{display: block;color: white !important;clear: both;background: #2ca5e0;position: relative;padding: 5px 20px 5px 45px; text-decoration: none !important;line-height: 40px;font-size: 17px;}.social-link-block:before{background-image: url(/wp-content/static/icons/telegram-icon.jpg); width: 40px; height: 40px; content: ""; display: inline-block; background-size: 40px 40px; background-position-y: 3px; background-repeat: no-repeat; position: absolute; left: 0; top: 50%; margin-top: -25px;}@media(max-width: 767px) {a.social-link-block{line-height: 25px;}}
The post “Bemor vafot etgan emasdi, u tirik bo‘lgan”. Sog‘liqni saqlash vazirligi qashqadaryolik Muhammadjonning holati bo‘yicha axborot berdi appeared first on Daryo .
Batafsil | Подробно | Read more... Daryo