IShID Airbus A321 halokati uchun mas’uliyatni o‘z zimmasiga oldi

“Iroq va Shom islom davlati”ning Misrdagi bo‘linmasi Rossiya samolyotining Sinay yarimorolidagi halokati uchun mas’uliyatni o‘z zimmasiga oldi. Bu haqda AFP’ga tayanib, “RBK” xabar bermoqda .

Foto: “TASS”

IShIDning bayonoti Telegram messenjerida paydo bo‘lgan. Jangarilarning shunga o‘xshash da’vosi terrorchilarning tarafdorlari tomonidan ishlatiladigan ijtimoiy tarmoqlarda hamda ekstremistlar faol foydalanadigan internet-portalda ham paydo bo‘lgan.
Britaniyalik jurnalistlarning aniqlik kiritishicha, layner halokatga uchragan hududda Misr xavfsizlik xizmatlari IShIDning Sinaydagi jangarilariga qarshi aksilterror operatsiyalarini o‘tkazib turadi.
Oldinroq Misr rasmiylari laynerning urib tushirilgani yoki portlatilganini isbotlovchi hech qanday dalil yo‘qligini ta’kidlagan va halokatga texnik nosozlik sabab bo‘lganini bildirgandi .
Terrorchilarning bayonotidan keyin Misr IIV yana bir marta qo‘poruvchilik sodir bo‘lgani haqidagi ma’lumotlarni rad etdi.
Eslatib o‘tamiz, samolyot bortida bo‘lgan 224 kishining hech biri tirik qolmagan . Layner bortida Rossiyadan tashqari Ukraina va Belarus fuqarolari ham bo‘lgan .
Aviahalokat sabab Rossiyada 1-noyabr umummilliy motam kuni deb e’lon qilindi .
Batafsil | Подробно | Read more... Daryo