AQSh Davlat kotibi Jon Kerri: BMT Samarqandda tashkil etilgan

AQSh Davlat kotibi Jon Kerri Qozog‘iston poytaxti Ostonadagi Nazarboyev-Universitetda Birlashgan Millatlar Tashkiloti aslida Amir Temur hukmronlik qilgan davrda Samarqandda tashkil etilganini ma’lum qildi. Bu haqda “12news.uz” xabar bermoqda .

Foto: Facebook / U.S. Embassy Tashkent

Eslatib o‘tamiz, AQSh Davlat kotibi Jon Kerri 1-noyabr kuni Samarqandga tashrif buyurgandi. Samarqandda uni O‘zbekiston Prezidenti Islom Karimov qabul qildi , shuningdek, u Markaziy Osiyo davlatlari tashqi ishlar vazirlari ishtirokidagi muzokaralarda qatnashdi .
“Men tog‘lar va dashtlar osha odamlar uchrashgan, turli mintaqalarning mahsulotlari va g‘oyalari to‘qnashgan joyni o‘z ko‘zlarim bilan ko‘rdim. Men mana bu g‘oyat ajoyib hikoyani yana bir bor takrorlashni istardim. XV asr boshida Kastiliya qiroli Genrix Uchinchi o‘z elchisi de Klavixoni Amir Temurning oldiga yuborgan. De Klavixoning uzoq sayohati Konstantinopol, Trapezund orqali, shundan so‘ng Shimoliy Erondan o‘tib, O‘rta Osiyoga, Samarqandga qadar davom etgan. Shu yerda u Amir Temur tomonidan qabul qilingan”, — dedi Kerri.
“De Klavixo o‘z kundaliklarida G‘arb uchun yangi, shu vaqtgacha noma’lum bo‘lgan turmush tarzining qiziqarli manzarasini tasvirlagan. U madaniyatlar, san’at, savdo va g‘oyalar chorrahasiga ta’rif bergan. Samarqandda siz qimmatbaho ipak, sanoat mahsulotlari va tilla, moviy shisha va chinnini topishingiz mumkin edi. Bu shaharda bir vaqtning o‘zida turklar, arablar, musulmonlar, yahudiylar, yunonlar, armanlar, nasroniylar, katoliklar va nestorianlar o‘zaro muloqot qilgan”, — dedi AQSh Davlat kotibi.
“Biz Birlashgan Millatlar Tashkiloti bundan 70 yil avval Nyu-Yorkda tashkil etilgan, deb hisoblaymiz. Yo‘q. Aslida bu hodisa bundan yuz yillar avval Samarqandda yuz bergan”, — deya qo‘shimcha qildi AQSh Davlat kotibi Jon Kerri.
Batafsil | Подробно | Read more... Daryo