Kanadalik ayol Tesla avtomobilini olib qochgan o‘g‘rini GPS orqali politsiyachilar bilan birga kuzatdi

Kanadaning Vankuver shahrida istiqomat qiluvchi Katya Pinkovski, politsiya xodimlari o‘g‘rining qayerda ekanligini avtomobilga o‘rnatilgan GPS orqali aniqlaganlaridan so‘ng, o‘g‘irlangan Tesla’sini muvaffaqiyatli tarzda qaytarib oldi. Bu haqda, Mashable’ga asoslanib, TJ xabar bermoqda .

Foto: TJ

Pinkovki oqshomgi konsertdan so‘ng mashina yo‘qolganini bilib qoldi: 29-oktabr, payshanba kuni u dugonasi bilan yerosti avtoturargohga qaytarkan, uning Tesla Model S 85 D’si (bunday Tesla’lar Vankuverda taxminan 130 ming dollardan sotiladi) joyida yo‘q ekanligini ko‘rdi. Evakuatsiya xizmati bu kecha hech qanday Tesla olib ketilmaganini ayolga ma’lum qildi.
Shundan so‘ng u eriga qo‘ng‘iroq qildi, u esa smartfonidagi Tesla Model S mobil dasturi yordamida Vankuver yaqinidagi Richmond bo‘ylab soatiga 70 kilometr tezlik bilan harakatlanayotganini ko‘rdi. Pinkovskining fikricha, o‘g‘ri mashinani oilaviy juftlik tasodifan avtomobil ichida qolgan zaxira elektron kalit yordamida olib qochgan (kalitning jevagi avtomobil yaqinida bo‘lsa, eshiklarni avtomatik ravishda ochib beradi).
Ayol 911 ga qo‘ng‘iroq qilib, avtomobilni kuzatish uchun politsiyachilarga GPS tizimiga kirish imkonini yaratib berdi. “Ishonch bilan aytishim mumkinki, dispetcher juda hayajonlanib ketdi. Ular shu vaqtgacha hali hech qachon o‘g‘irlangan mashinani rostmana kuzatib borish imkoniga ega bo‘lmagandi”. Keyinroq politsiya vakillari bu holat mashinaning qayerda turganini onlayn vaqt rejimida ko‘rsatib turuvchi ma’lumotlardan foydalanish bo‘yicha o‘ziga xos tajriba bo‘lgani, shuningdek, Kanadada ilk bor Tesla avtomobili o‘g‘irlanganini tan oldi.
Pinkovski bevosita Tesla’ga qo‘ng‘iroq qilib, avtomobilning dvigatelini masofadan turib o‘chirib qo‘yishni so‘rash haqida ham o‘ylagan. Bundan tashqari, u mobil dasturdan foydalanib, avtomobil lyukini ochib, gudokni ham bosishi mumkin edi. Oxir-oqibat ayol politsiyachilarga xalal bermaslikka qaror qildi, politsiya esa 30-oktabrga o‘tar kechasi tungi soat 1:00da qonunbuzarga yetib olib, uni qo‘lga oldi. 24 yoshli o‘g‘riga nisbatan qiymati 5 ming dollardan ortiq bo‘lgan mulkni o‘g‘irlash ayblovi ilgari surildi, sud noyabrda bo‘lib o‘tadi.
Marketwatch ma’lumotlariga ko‘ra, 2014-yil oktabr oyi holatiga ko‘ra, AQShda to‘rt marta Tesla avtomobillari o‘g‘irlangan: bittasi 2011-yilda, uchtasi 2013-yilda. So‘nggi holatda bu AQShda sotilgan barcha Tesla mashinalarining 0,00015 foizini tashkil etgan. Taqqoslash uchun, boshqa markadagi mashinalarning o‘g‘irlanish ko‘rsatkichi 0,00384 foizga teng, ya’ni, Tesla’ning ko‘rsatkichlaridan 20 marotaba ko‘p.
TJ’ning Moscow Tesla Club’ning kommunikatsiyalar bo‘yicha direktori Igor Antarovga asoslanib ma’lum qilishicha, hozircha Rossiyada Tesla’ning o‘g‘irlanishi bilan bog‘liq birorta ham holat ma’lum emas. Uning so‘zlariga ko‘ra, Tesla’ni “o‘g‘irlash amalda befoyda harakat”.
“Birinchidan, uni mobil dastur orqali oson kuzatib borish mumkin. Ikkinchidan, Tesla Motors’ga qo‘ng‘iroq qilib, avtomobilni blok qilib qo‘yishni so‘rash mumkin. Uchinchidan, mazkur avtomobil ehtiyot qismlarining ikkilamchi bozori yo‘q. Oxir-oqibat, o‘g‘irlangan Tesla’ni qayta sotishning amalda imkoni yo‘q. Uni tarmoqdan uzib qo‘yish yo‘li topilganida ham, proshivkasini yangilab bo‘lmaydi, navigatsiya, internet-radio ishlamaydi. Bunday Tesla’ning kimga keragi bor?”, — Igor Antarov.
Batafsil | Подробно | Read more... Daryo