“Paxtakor” futbolchilari Qarshida “Nasaf”ni mag‘lubiyatga uchratdi

Oliy Liga 29-turidan o‘rin olgan dastlabki uchta uchrashuv 4-noyabr, chorshanba kuni bo‘lib o‘tdi. “Uff.uz” xabariga ko‘ra , Qarshida “Nasaf” “Paxtakor”ni, Olmaliqda “Olmaliq” “Bunyodkor”ni qabul qilgan bo‘lsa, Toshkentda “Lokomotiv” “Mash’al” bilan bahs olib bordi .

Foto: Twitter / @fcnasaf

“Olmaliq” — “Bunyodkor” uchrashuvi 1:1 hisobidagi durang natija bilan yakunlandi. Dastlab “Bunyodkor” hujumchisi Vohid Shodiyev hisobni ochgan bo‘lsa, ikkinchi bo‘limda “Olmaliq” vakili Shavkat Salomov hisobni tenglashtirdi. “Lokomotiv” — “Mash’al” uchrashuvi taqdirini yagona gol hal qildi — Marat Bikmayev urgan gol “temiryo‘lchilar”ga g‘alaba keltirdi.
Musobaqa peshqadami, Toshkentning “Paxtakor” klubi 2015-yilgi O‘zbekiston Kubogi sohibi “Nasaf”ni 1:0 hisobida mag‘lub etib, navbatdagi chempionlik sari yanada yaqinlashdi. “Paxtakor”ga g‘alaba keltirgan gol uchrashuv yakunlanishiga 15 daqiqadan kamroq vaqt qolganida Kamoliddin Tojiyev hisobiga yozildi.
4-turning qolgan barcha uchrashuvlari 5-noyabr, payshanba kuni Toshkent vaqti bilan 14:00 da boshlanadi. Shu kuni “Qo‘qon-1912” — “So‘g‘diyona”, “Sho‘rtan” — “Navbahor”, “Buxoro” — “Neftchi”, “Andijon” — “Dinamo” va “Qizilqum” — “Metallurg” bahslari bo‘lib o‘tadi.
29-turning dastlabki uch o‘yinidan so‘ng, musobaqa jadvalining yuqori qismidagi vaziyat o‘zgarishsiz qoldi. Chempionat yakunlanishiga bir tur qolganida “Paxtakor” 72 ochko bilan peshqadamlik qilmoqda, 2-o‘rindagi “Lokomotiv” hisobida 71 ochko bor. 3-o‘rindagi “Nasaf” bronza medallar egasiga aylanib bo‘ldi — jamoa “Lokomotiv”ga yeta olmaydi, 4-o‘rindagi “Bunyodkor” esa “Nasaf”ga yeta olmaydi.

Skrinshot: “Championat.asia”

30-turda “Paxtakor” o‘z maydonida musobaqa autsayderlaridan biri “Andijon”ni qabul qiladi, “Lokomotiv” esa “Navbahor” mehmoni bo‘ladi. So‘nggi turda “Lokomotiv” qayd etgan har qanday natijani (g‘alaba, durang yoki mag‘lubiyat) takrorlash “Paxtakor”ni amalda O‘zbekiston chempioniga aylantiradi.
Batafsil | Подробно | Read more... Daryo