Boku aeroporti: “Jahondagi eng chiroyli havo bandargohi!” (foto)

Rossiyalik sayohatchi-bloger Aleksandr Cheban Ozarbayjon poytaxti Boku shahridagi Haydar Aliyev nomli xalqaro aeroport haqida fotoreportaj tayyorladi.

Foto: “Alexcheban.livejournal.com”

“Men jahonning yuzlab aeroportlarida bo‘lganman, biroq hech qayerda Bokudagichalik estetik zavq olmaganman. Aytishim mumkinki, Bokuga kamida uning aeroportini tomosha qilish uchun ham kelsa bo‘ladi”, — deb yozgan Cheban, Boku aeroportini “zamonaviy san’at muzeyi”ga qiyoslagan.

Foto: “Alexcheban.livejournal.com”


Foto: “Alexcheban.livejournal.com”

Chebanning qayd etishicha, Boku aeroportini bevosita Dubay yoki Singapur havo bandargohlari bilan taqqoslab bo‘lmaydi — Ozarbayjon poytaxtida yo‘lovchilar oqimi ham, ko‘lam ham Dubay yoki Singapurchalik katta emas. “Biroq bu yerda shunday muhit yaratilganki, reysni kutish — qulay bir mashg‘ulot, reysdan tushish esa hayratga soladi”, — deydi bloger.

Foto: “Alexcheban.livejournal.com”

Tashqi tomondan Boku aeroporti aksariyat zamonaviy aeroportlar ruhida qurilgan — beton, shisha va metall kabi yuqori texnologik materiallardan bunyod etilgan binoning g‘aroyib geometrik shakllardagi ko‘rinishlaridan futurizm ufurib turadi.

Foto: “Alexcheban.livejournal.com”


Foto: “Alexcheban.livejournal.com”

Aeroport ichkarisida esa Turkiyaning Autoban me’morlik studiyasi Sharq mehmonnavozligidan ilhom olib, pilla ko‘rinishidagi yog‘och elementlardan jonli va noodatiy intererni ishlab chiqqan.

Foto: “Alexcheban.livejournal.com”

Terminalning o‘zi unchalik katta emas — u yiliga 6 million yo‘lovchiga xizmat ko‘rsatish quvvatiga ega, maydoni 65 ming kvadrat metrni tashkil etadi. To‘rt qavatli aeroportga keng xoll orqali kirib boriladi.

Foto: “Alexcheban.livejournal.com”

“Bu kutib olayotganlar uchun ham, sayohatga yo‘l olayotganlar uchun ham birdek shinam bo‘lgan kamdan-kam aeroportlardan biridir. Uchib ketish va kutib olish zonasiga gilam to‘shalgan — bunday holatni Singapurda, Dehlida, qisman Gongkongda uchratishingiz mumkin”, — deb yozadi bloger.

Foto: “Alexcheban.livejournal.com”


Foto: “Alexcheban.livejournal.com”

Ma’lumot uchun, The Guide to Sleeping in Airports (“Aeroportlarda uxlash bo‘yicha yo‘riqnoma”) internet-resursi tanloviga ko‘ra , Bokudagi Haydar Aliyev nomli aeroport Osiyodagi eng yaxshi 25 havo bandargohidan biri hisoblanadi. Qayd etish joiz, mazkur internet-resursning “Jahon eng yomon aeroportlari” reytingida Toshkent xalqaro aeroporti to‘rtinchi o‘rinda turadi.
Batafsil | Подробно | Read more... Daryo