Qodirov Charlie Hebdo karikaturachilarini yaramaslar deb atadi

Checheniston rahbari Ramzan Qodirov Rossiya samolyotining Misrdagi halokati mavzusida karikaturalar chop etgan Fransiyaning Charlie Hebdo gazetasi xodimlarini yaramaslar deb atadi. Qodirov bu haqdagi fikrini o‘z Instagram ’ida bayon qildi.

Foto: “Gorodskoitelegraf.ru”

Uning ta’kidlashicha, halokat qurbonlarining “yaqinlari va qarindoshlari, butun mamlakat dard-alamlari ustidan kulishning bundan ortiqroq yo‘lini topib bo‘lmaydi”.
Eslatib o‘tamiz, Rossiyaning “Kogalimavia” kompaniyasiga tegishli A321 yo‘lovchi samolyotining Misrdagi halokati fransuz satirik gazetasi Charlie Hebdo karikaturasiga mavzu sifatida xizmat qildi . O‘zining provokatsion maqolalari bilan tanilgan nashrning yangi sonida 224 kishini hayotdan olib ketgan fojia mavzusi birdaniga ikki suratda aks ettirilgan.
Kremldagilar karikaturalarning chop qilinishini “tahqirlash” deb atadi. “Buning na demokratiyaga, na o‘z fikrini erkin ifoda qilishga, hech narsaga bog‘liqligi yo‘q — bu tahqirlash”, — deya ta’kidladi Rossiya prezidenti matbuot kotibi Dmitriy Peskov.
Charlie Hebdo’ning bosh muharriri Jerar Biar esa Peskovning gapiga javoban tahqirlash tushunchasi nashr uchun mavjud emasligini aytdi . Uning ta’kidlashicha, Rossiya samolyoti qulashiga bog‘liq tasvirlar fojia qurbonlari yoki faktlari ustidan kulish maqsadiga ega emas. “Bu rasmlarda karikatura personajlari yo‘q. Biz shunchaki hodisaga izoh berib, unga nisbatan nuqtai nazarimizni ko‘rsatyapmiz”, — dedi Biar.
Batafsil | Подробно | Read more... Daryo