O‘zbekiston — KXDR uchrashuvi chiptalari narxi o‘yinga uch kun qolganida belgilanganidan qimmatlashdi

Futbol bo‘yicha 2018-yilgi jahon chempionati va 2019-yilgi Osiyo Kubogi saralash bosqichi doirasida 12-noyabr, payshanba kuni Toshkentdagi “Paxtakor” stadionida o‘tkaziladigan O‘zbekiston va KXDR milliy terma jamoalari o‘rtasidagi uchrashuvga uch kun qolganida, markaziy sektorlar uchun chiptalar stadion kassalarida qolmadi. Bu haqda O‘zMTRK “Sport” telekanalining “Futbol sharhi” ko‘rsatuvida xabar berildi, ko‘rsatuvdan lavha “Championat.asia” saytida e’lon qilingan .

Kadr: Youtube

Eslatib o‘tamiz, O‘zbekiston — KXDR uchrashuvi chiptalari 6-noyabr kuni soat 14:00 dan sotuvga chiqarilgani, CIP toifali chiptalar narxi 30 ming, qolgan barcha sektorlar uchun chiptalar narxi 15 ming so‘m etib belgilangani haqida avvalroq xabar berilgan edi .

Ko‘rsatuvda qayd etilishicha, chiptalar savdosiga O‘zbekiston Futbol Federatsiyasining Terma jamoalar markazi emas, balki o‘yin o‘tkazilayotgan “Paxtakor” stadioni rahbariyati mas’ul bo‘lgan. Ko‘rsatuvga intervyu bergan xaridorlardan biri stadion ko‘chma kassalarida markaziy sektorlar uchun chipta qolmagani, olib-sotarlar esa markaziy sektor chiptalarini belgilanganidan qimmat narxda taklif qilayotgani haqida aytib o‘tgan.

“Futbol sharhi” ko‘rsatuvi ijodkorlari yashirin kamera orqali chipta olib-sotarlari faoliyatini tasvirga olishga harakat qilgan. Ma’lum bo‘lishicha, ular CIP sektorga yondosh va unga qarama-qarshi tomondagi markaziy sektorlarning aslida 15 ming so‘mlik chiptalarni kamida 20 ming so‘mdan taklif qilmoqda, ba’zi holatlarda chipta narxi 30 ming so‘mgacha bormoqda.
Qayd etishlaricha, o‘yin kuni aslida 15 ming so‘mlik chiptalar narxi yanada qimmatlashishi mumkin — shu kuni milliy terma jamoa ishtirokidagi o‘yinni tomosha qilish uchun viloyatlardan ham futbol muxlislari stadionga tashrif buyuradi va aksariyati chiptani bevosita o‘yin oldidan, belgilangan narxidan qimmatga sotib olishga majbur bo‘ladi.
Eslatib o‘tamiz, O‘zbekiston va KXDR milliy terma jamoalari o‘rtasidagi o‘yin 12-noyabr kuni soat 18:00 da boshlanadi. O‘yinni Alirizo Fag‘oni boshchiligidagi eronlik hakamlar brigadasi boshqarib boradi. Ayni vaqtda “H” saralash guruhida KXDR terma jamoasi beshta o‘yinda 13 ochko to‘plagan holda peshqadam bo‘lib turibdi. O‘zbekiston esa guruhdagi raqiblaridan bir o‘yin kam o‘tkazgan holda 9 ochko bilan ikkinchi o‘rinni egallab turibdi.
Batafsil | Подробно | Read more... Daryo