АҚШ Миср судининг «Ал-Жазира» журналистларига нисбатан чиқарган ҳукмидан хавотирда эканлигини маълум қилди

Миср судининг «Ал-Жазира» телеканали журналистларига чиқарган ҳукмидан АҚШнинг хафсаласи пир бўлди ва бундан хавотирда. Бу ҳақда, «Echo.msk.ru» хабарига кўра , АҚШ Давлат департаменти расмий вакили Жон Кирби маълум қилди.

Фото: abclocal.go.com

Унинг сўзларига кўра, АҚШ Давлат департаменти Миср ҳукуматини «барқарорлик ва тараққиёт учун зарур бўлган фикр билдириш эркинлигини йўққа чиқарувчи» мазкур ҳукмни ўзгартириш учун барча керакли чораларни кўришга чақиради.
Аввалроқ Европа ташқи сиёсат маҳкамасининг расмий вакили «Ал-Жазира» журналистларига нисбатан чиқарилган ҳукм фикр билдириш эркинлигига нисбатан зарба бўлганини таъкидлаган эди.
Куни кеча Миср суди Қатарнинг «Ал-Жазира» телеканалида ишлайдиган уч журналист — Канада фуқароси Муҳаммад Фахмий, австралиялик журналист Питер Грист ва мисрлик продюсер Боҳир Муҳаммадни уч йилга озодликдан маҳрум этиш ҳақида ҳукм чиқарган эди .
Судьянинг қайд этишича, мазкур журналистлар Мисрдаги ОАВ ходимлари бирлашмасида рўйхатдан ўтмаган, махсус хизматларнинг рухсатномасини олмасдан мамлакат ҳудудига асбоб-ускуналарни олиб кирган, меҳмонхонада ноқонуний равишда трансляция нуқтасини ўрнатган. Судьянинг алоҳида таъкидлашича, судланувчилар Мисрдан «ёлғон хабарлар»ни узатган.
Batafsil | Подробно | Read more... Daryo