Bavariyadagi uyda yetti nafar chaqaloqning jasadi topildi

Bavariyada (Germaniya) joylashgan Vallenfels shahridagi uylardan birida yetti nafar chaqaloqning jasadi topildi. Ular 12-noyabr, payshanba kuni chaqiriq bo‘yicha yetib kelgan tez tibbiy yordam brigadasi tomonidan aniqlangan. Bu haqda mahalliy politsiyaga tayanib, Süddeutsche Zeitung nashri ma’lum qildi, deya xabar beradi “RBK”.

Foto: AFP

Politsiya vakili Anne Xyoferning aytishicha, jasadlar uydagi bitta xonada saqlangan, qog‘oz sochiq va plastik paketlarga o‘ralib, qutiga joylashtirilgan. 13-noyabr, juma kuni bolalar jasadi qoldiqlari ekspertizaga jo‘natilgan, uning natijalari kelgusi hafta boshida ma’lum bo‘lishi mumkin.
Bolalar qachon va qay holatda o‘lgani, jinsi hamda yoshi haqida hozircha ma’lumotlar yo‘q. Prokuratura vakili Martin Dippolt ayrim jasadlar uyda bir necha yil saqlanganini bildirdi.
Qo‘shnilarning aytishicha, mazkur oila “bolalariga mehribon ajoyib insonlar” bo‘lgan er-xotin, ulardan birining onasi va bir necha nafar boladan iborat (ular juftlikning oldingi turmushidan). Jasadi aniqlangan chaqaloqlarning onasi ekanligi taxmin qilinayotgan 45 yoshli ayolni topib, so‘roqqa tutishning imkoni bo‘lmagan: turmush o‘rtog‘i bilan arazlashgan ayol sentabr oxirlarida boshqa joyga ko‘chib o‘tgan.
Batafsil | Подробно | Read more... Daryo