Uzum suvi ishlab chiqaruvchi Kitob tumanidagi korxona 300 ming dollarlik mahsulotni eksport qiladi

Faoliyatini o‘tgan yili boshlagan Kitob tumanidagi “Kitob ne’mati” mas’uliyati cheklangan jamiyatida mevani qayta ishlash yo‘lga qo‘yilgandi. Xususan, Italiya davlatidan keltirilgan zamonaviy uskunalar yordamida uzumni qayta ishlab, undan uzum suvi (sulfo-suslo) ishlab chiqarish tashkil qilindi, deb xabar qiladi “Qashqadaryo” gazetasi.

Foto: “Rizedeyiz.com”

- Buning uchun tijorat bankidan 300 million so‘m kredit olgandik, — deydi korxona ish yurituvchisi G‘ulom Asomov. – Joriy mavsumda mahalliy ishlab chiqaruvchilardan 1328 tonna uzum sotib oldik. Mavjud uskunalar yordamida bir soatda 15 tonna uzumni qayta ishlash imkoniga egamiz. Bu yili 121 ming dal (bir dal 10 litrga teng) sulfo-suslo ishlab chiqardik. Tayyor mahsulotning asosiy qismini xorijga eksport qilishni mo‘ljallab turibmiz. Xususan, qozog‘istonlik hamkorlar bilan qiymati 308 ming AQSh dollarilik mahsulot yetkazib berish bo‘yicha shartnoma imzoladik. Boshqa mamlakatlardan ham talab tushayapti. Kelgusida mahsulot turini ko‘paytirish niyatidamiz. Shuningdek, mahsulotning eksportbopligini oshirish uchun uni turli o‘lchamdagi idishlarga qadoqlashni ham joriy etmoqchimiz. Hozirgi kunda 20 nafarga yaqin kishini ish bilan ta’minlaganmiz.
G‘ulom Asomovning aytishicha, korxonada bir qator istiqbolli loyihalarni amalga oshirish ko‘zda tutilgan. Misol uchun, kelgusida chet el texnologiyasi asosida qurilish materiallari ishlab chiqarishni tashkil qilish rejalashtirilgan.
Batafsil | Подробно | Read more... Daryo