Putin va Olland IShIDga qarshi birgalikda kurashish xususida kelishib oldi

Rossiya prezidenti Vladimir Putin “Moskva” raketa kreyseri komandiriga O‘rtayer dengizida fransuz harbiy-dengiz guruhi bilan o‘zaro aloqa o‘rnatishni topshirdi. Bu haqda “Vedomosti” xabar bermoqda .

Foto: AP

“Yaqin kunlarda siz harakatlanayotgan hududga aviatashuvchi boshchiligidagi fransuz harbiy-dengiz guruhi yetib keladi. Ular bilan to‘g‘ridan-to‘g‘ri aloqa o‘rnatish va ittifoqdoshlar kabi ishlash zarur”, — deya ko‘rsatma bergan Putin Rossiya mudofaa vazirligidagi yig‘ilishda.
Fransiyaning “Sharl de Goll” aviatashuvchisi IShIDga qarshi harbiy amaliyotlarga qo‘shilish uchun Suriya va Livan qirg‘oqlariga yo‘l olmoqda. “‘Sharl de Goll’ 19-noyabr, payshanba kuni dengizga chiqadi va bir necha kundan so‘ng O‘rtayer dengiziga yetib boradi. Bu bizning kuchlarimizni uch karra oshiradi”, — deya ma’lum qilgan Fransiya prezidenti Fransua Olland.
Kreml matbuot xizmatining xabar berishicha, Putin va Olland telefon orqali muloqotda bo‘lgan hamda Misrda Rossiya samolyoti qulashi, Parijdagi teraktlar munosabati bilan xalqaro terrorchilikka qarshi kurashda, xususan, Suriyadagi amaliyotlarda hamkorlikni kuchaytirishni kelishib olgan.

Voqea: Misrda qulagan A321 , Parijdagi teraktlar


Batafsil | Подробно | Read more... Daryo