Tergov qo‘mitasi Boris Nemsov o‘ldirilishi bo‘yicha ayblanayotganlarni hibsda saqlash muddatini fevralgacha uzaytirishni so‘ramoqda

Moskvadagi Basmanniy sudi kelgusi haftada Boris Nemsov o‘ldirilishi bo‘yicha jinoiy ish qatnashchilarini hibsda saqlab turish muddatini uzaytirish masalasini ko‘rib chiqadi. Bu haqda “Kommersant.ru” xabar bermoqda .

Foto: “NTV”

“Tergov qo‘mitasi ularni hibsda saqlash muddatini 2016-yil fevraligacha uzaytirishni so‘ramoqda”, — deya ma’lum qilgan sud matbuot kotibi Anna Fadeyeva.
Nemsovning o‘ldirilishi bo‘yicha ochilgan jinoiy ish doirasida besh kishi — Zaur Dadayev, Anzor Gubashev, Shadid Gubashev, Hamzat Baxayev va Tamerlan Eskerxanov qamoqqa olingan. Tergov Zaur Dadayevni siyosatchining bevosita qotili, qolganlarni esa uning sheriklari sifatida ko‘rmoqda.
Basmanniy sudi 18-noyabr kuni Boris Nemsov o‘ldirilishining tashkilotchisi bo‘lgani bildirilayotgan Rossiya IIV ichki qo‘shinlari sobiq harbiy xizmatchisi Ruslan Muhiddinovni sirtdan hibsga olgani to‘g‘risida xabar bergandik . Sud qarori kuchga kirgach, ayni paytda Birlashgan Arab amirliklarida yashiringani taxmin qilinayotgan Muhiddinov Interpol tomonidan qidiriladi.
Batafsil | Подробно | Read more... Daryo