Erdo‘g‘on: Turkiya harbiy-havo kuchlari Su-24 ga hujum qilish paytida uning Rossiyaga tegishli ekanligini bilmagan

Turkiya hukumati mamlakat harbiy-havo kuchlari Rossiya harbiy samolyotini urib tushirgani haqida, buni Rossiya mudofaa vazirligi tasdiqlagachgina, xabar topgan. Bu haqda Turkiya prezidenti Toyyib Erdo‘g‘on Istanbuldagi xalqaro islom iqtisodiy kongressida ma’lum qildi, deb yozadi “RIA Novosti”.

Foto: AP

“Samolyot Rossiya Federatsiyasiga tegishli ekanligi, bu haqda Rossiya hukumati e’lon qilgachgina, tushunarli bo‘ldi”, — dedi Erdo‘g‘on.
Uning aytishicha, ikkita harbiy samolyot Turkiya havo hududiga bostirib kirgan, ulardan biri u yerni tark etgan, ikkinchisi urib tushirilgan. “Ularga harbiylarimiz tomonidan besh daqiqa davomida o‘n marta ogohlantirish berilgan. Samolyotlardan biri Turkiya hududidan chiqib ketgan. Ikkinchisi esa hududimizga bostirib kirishda davom etgan. Chegarada soqchilik qilayotgan F-16 qiruvchilarimiz unga qarata o‘t ochgan”, — dedi Erdo‘g‘on.
Eslatib o‘tamiz, Turkiya harbiy-havo kuchlarining F-16 qiruvchisi 24-noyabr, seshanba kuni Rossiyaning Su-24 bombardimonchisini urib tushirgan edi.

Voqea: Turkiya urib tushirgan Su-24


Batafsil | Подробно | Read more... Daryo