Turkiya Rossiya bilan aloqa kanallarini ochiq holda saqlab qolishni birinchi galdagi vazifa deb atadi

Rasmiy Anqara, Su-24 samolyoti halokatidan keyin Turkiya va Rossiya o‘rtasidagi munosabatlar sovuqlashib ketgan bir vaqtda, Rossiya bilan barcha aloqa kanallarini ochiq holda saqlab qolishni birinchi galdagi vazifa, deb hisoblaydi. Bu haqda Turkiya bosh vaziri Ahmet Davuto‘g‘li ma’lum qildi, deya xabar bermoqda “Gazeta.ru”.

Foto: Umut Gazetesi

“Biz uchun birinchi galdagi vazifa — Rossiya bilan barcha aloqa kanallarini ochiq holda saqlab qolishdir”, — dedi Davuto‘g‘li.
Avvalroq Rossiya prezidenti Vladimir Putin Turkiyaga nisbatan maxsus iqtisodiy choralar ko‘rish to‘g‘risidagi farmonni imzolagan edi. Hujjat amalda Turkiya biznesiga nisbatan sanksiyalar joriy etadi — Turkiyada ishlab chiqarilgan mahsulotlar importi va Rossiya hududida turkiyaliklarni ishga yollash taqiqlanadi. Cheklovlarning aniq ro‘yxati Rossiya hukumati tomonidan ishlab chiqiladi.


Voqea: Turkiya urib tushirgan Su-24


Rossiyaning Su-24 bombardimonchi samolyoti 24-noyabr kuni Turkiya harbiy-havo kuchlari tomonidan urib tushirilgan va Suriyaning Latakiya viloyatiga qulagan edi. Ushbu hodisa uchun javobgarlikni Turkiya o‘z bo‘yniga oldi va Rossiyani Turkiyaning havo kengliklarini buzishda aybladi. Rasmiy Moskva esa samolyot faqat Suriya hududida uchganini ta’kidlamoqda.
Batafsil | Подробно | Read more... Daryo