iPhone fonarchasi 11 yoshli qizga onasining hayotini saqlab qolishda yordam berdi

iPhone smartfoni, topqirlik va favqulodda holatlarda sarosimaga tushmaslik Avstraliyaning Suon-Xill shahrida yashovchi 11 yoshli Lara Albanga onasining hayotini saqlab qolishida yordam berdi. Bu haqda “Hi-Tech Mail.ru” xabar bermoqda .

Lara Alban onasi Shona (chapda) va G‘arbiy Avstraliya gubernatori Kerri Sanderson bilan. Foto: “Mail.ru”

Kechki payt Lara poni otini sayrdan so‘ng otxonaga qo‘yib chiqayotganida qichqiriqni eshitadi. Ortiga o‘girilgan qiz yerda yotgan va ingrayotgan onasi Shonani ko‘rib qoladi. Yugurib borgan Lara uning yuzi qonga belanganiga guvoh bo‘ldi: ayol oilaning erkatoyi bo‘lgan Nala laqabli ot tepkisi tufayli jiddiy jarohat olgandi. Qiz qo‘rqib ketdi, biroq sarosimaga tushmadi. Onasining telefonini olib, qutqaruv xizmatiga qo‘ng‘iroq qildi, so‘ng 17 daqiqa davomida ularning telefon orqali aytib turgan tavsiyalarini bajarib, birinchi tibbiy yordam ko‘rsatdi.
Chaqiriq bo‘yicha yetib kelgan shifokorlar qorong‘ida uyni adashtirib qo‘ydi, biroq Lara bu gal ham shoshib qolgani yo‘q va iPhone fonarchasidan foydalanib, ularni chorladi. Shu tufayli Shonaga vaqtida tibbiy yordam ko‘rsatildi.

Foto: “Hi-Tech Mail.ru”

Singan jag‘iga oltita platinali plastina qo‘yilgan ayolning aytishicha, agar qizi bo‘lmaganida voqea sodir bo‘lgan kuni hayotdan ko‘z yumgan bo‘lardi. Lara mahalliy tez tibbiy yordam xizmati vakillari tomonidan St. John Ambulance Community Hero Award mukofoti bilan taqdirlandi. Ularning aytishicha, qiz favqulodda vaziyatda o‘zini ancha-muncha kattalarga qaraganda xotirjamroq va aqlliroq tutgan.
Batafsil | Подробно | Read more... Daryo