Rossiya hukumati taqiqlangan Turkiya mahsulotlari ro‘yxatini e’lon qildi

Rossiya hukumati Turkiyada ishlab chiqarilgan (yetishtirilgan) va 2016-yil 1-yanvardan boshlab Rossiyaga olib kelinishi taqiqlangan mahsulotlar ro‘yxatini tasdiqladi. “RBK” xabariga ko‘ra , bevosita Turkiyadan qaytayotgan rossiyaliklar tomonidan olib kelinayotgan va shaxsiy foydalanish normalaridan oshmagan miqdordagi mahsulotlar taqiqqa tushmaydi.

Foto: “RBK”

Hukumat qaroriga muvofiq, Turkiyada yetishtirilgan pomidor va bodring, piyoz, gulkaram va brokkoli kabi sabzavotlar taqiqqa tushgan.
Mevalarning qora ro‘yxatidan yangi va quritilgan sitruslar (apelsinlar, mandarinlar va ularning gibridlari), yangi olmalar, noklar, o‘riklar, shaftolilar, nektarinlar, olxo‘rilar va tyorn, shuningdek, uzum, yertut va qulupnay o‘rin olgan.
Chorvachilik mahsulotlaridan muzlatilgan tovuq va kurka go‘shtlari va ulardan tayyorlangan mahsulotlar embargoga tushgan.
Bundan tashqari, 2016-yil 1-yanvardan e’tiboran Turkiyadan Rossiyaga tuz, shuningdek, guldasta tayyorlash yoki boshqa bezaklash ishlari uchun yaroqli yangi chinnigul olib kirish ham taqiqlanadi.
Ekspertlarning xavotirlarga qarshi olaroq, bir qator meva va sabzavotlar (masalan, limonlar), yirik qoramol go‘shti, sut mahsulotlari va baliq taqiqqa tushmadi.
Rossiya prezidenti Vladimir Putin 28-noyabr kuni Turkiyaga nisbatan sanksiyalar joriy etish haqidagi farmonni imzolagan edi.
Suriya chegarasi yaqinida Rossiyaning Su-24 bombardimonchi samolyoti urib tushirilganidan so‘ng, Turkiyaga nisbatan cheklovchi choralar ko‘rildi.
Batafsil | Подробно | Read more... Daryo