Britaniyalik bokschi Tayson Fyuri IBF versiyasi bo‘yicha jahon chempionligi unvonidan mahrum etildi

O‘ta og‘ir vaznda uch nufuzli yo‘nalish bo‘yicha jahon chempioni britaniyalik Tayson Fyuri Xalqaro boks federatsiyasi (IBF) versiyasi bo‘yicha chempionlik unvonidan mahrum etildi. Bu haqda IBF chempionlik janglari qo‘mitasi raisi Lindsi Taker ma’lum qildi, deya xabar beradi “TASS”.

Foto: EPA

Mazkur qarorga Fyurining IBF chempionligiga nomzod, ukrainalik Vyacheslav Glazkov bilan bellashuvdan bosh tortganligi sabab bo‘lgan. Takerning ta’kidlashicha, britaniyalik bokschi tashkilot shartlariga bo‘ysunmay, birinchi galda Glazkov bilan ringga chiqish o‘rniga Vladimir Klichko bilan revansh jangini o‘tkazishini bildirgan. Ushbu bellashuv 2016-yil aprel—may oylarida o‘tkazilishi rejalashtirilgan. Fyurining jamoasi IBF qaroriga apellyatsiya berish niyatida.
Eslatib o‘tamiz, 29-noyabr kuni Dyusseldorfda (Germaniya) bo‘lib o‘tgan jangda Fyuri WBA (Super), WBO va IBF yo‘nalishlari bo‘yicha o‘ta og‘ir vazndagi jahon chempioni Vladimir Klichkoni mag‘lub etgan .
Batafsil | Подробно | Read more... Daryo