Olimlar SMS-xabar oxiriga qo‘yilgan nuqta uni yolg‘onga aylantirishini aniqladi

SMS-xabarlar oxiriga qo‘yilgan nuqta qabul qilib oluvchida nosamimiylik tasavvurini uyg‘otadi va u yuboruvchining gaplariga ishonmaydi. AQShning Bingemton universiteti psixologlari eksperiment o‘tkazib, shunday xulosaga keldi, deb yozadi “Korrespondent.net”.

Foto: “Gizmonews.ru”

Eksperimentda 126 nafar talabaga ikki kishining SMS ko‘rinishidagi dialogini o‘qittirishdi. Bunda yuboruvchining xabari taklif ma’nosidagi savol (masalan, “Deyv menga ortiqcha chipta berdi. Sen ham borasanmi?”) va unga rozilik ma’nosidagi javob (“Albatta” yoki “Okey”)dan iborat bo‘ldi. Javoblar ikki xil variantda: nuqtali va nuqtasiz holda taqdim etildi.
Eksperimentning barcha ishtirokchilari nuqtali xabarlarni eng nosamimiy deb topdi.
“SMS-xabarlar jonli muloqotda qo‘llaniladigan ko‘plab noverbal signallardan xoli. Suhbat chog‘ida odamlar o‘z hissiyotlari haqidagi axborotni ko‘zlar, yuz ifodasi, ovoz ohangi kabilar yordamida uzatadi. SMS-yozishuvda bunday mexanizmlar yo‘q. Bunday vaziyatda odamlar hamsuhbatining kayfiyati haqida smayliklar, ataylab yo‘l qo‘yilgan imlo xatolari va tinish belgilari yordamida bilib olishiga to‘g‘ri keladi”, — dedi eksperiment rahbari Seliya Klin.
Boshqa bir loyiha doirasida esa Klin va uning hamkasblari undov belgisi bilan tugaydigan xabarlar ancha samimiy deb qabul qilinishini aniqladi.
Batafsil | Подробно | Read more... Daryo