OFKga a’zo futbol asotsiatsiyalari reytingida O‘FF 10-o‘rinni egalladi

Osiyo futbol konfederatsiyasi futbol federatsiyalarining so‘nggi 4 yillik uchun yakuniy reytingini ma’lum qildi. O‘zbekiston futbol federatsiyasi ushbu reytingda 10-o‘rinni egalladi. Bu haqda O‘FF matbuot xizmati xabar bermoqda .

Foto: “Stadion.uz”

OFK taqdim etgan ro‘yxatda O‘zbekiston jamg‘argan ochkolari soni 35.917 ekani ko‘rsatilgan.
Ushbu reytingda peshqadamlikni 77.167 ochko yiqqan Saudiya Arabistoni egalladi. Ikkinchi o‘rinni Janubiy Koreya 68.250 ochko yiqqan holda qo‘lga kiritdi. Kuchli uchlikni Birlashgan Arab Amirliklari yakunlab bergan. Ushbu mamlakat hisobida 60.083 ochko bor.
O‘zbekistongacha bo‘lgan keyingi o‘rinlarda Eron, Yaponiya, Xitoy, Qatar, Avstraliya va Kuvayt joy olgan.
Ma’lumot uchun, ushbu reyting 2012-yilning 1-yanvaridan, 2015-yil dekabriga qadar klublar va terma jamoalar qayd etgan natijalarga ko‘ra hisoblangan.
Osiyo klublarining ushbu davr uchun tuzilgan reytingida O‘zbekiston klublari orasida eng yaxshi natijani “Bunyodkor” qayd etgan – 12-o‘rin. Xitoyning “Guanchjou Evergrand” klubi peshqadam bo‘lgan ushbu ro‘yxatda O‘zbekiston klublari orasida ikkinchi natijani “Paxtakor” ko‘rsatgan – 34-o‘rin. Ro‘yxatdan, shuningdek, “Nasaf” (53), “Lokomotiv” (73) hamda “Neftchi” (81) jamoalari ham o‘rin olgan.
Batafsil | Подробно | Read more... Daryo