Тошкентда янги MAN автобуси 44-йўналиш бўйлаб ҳаракатланишни бошлади

Тошкент шаҳрида газда ҳаракатланувчи MAN автобуси синови якунига етди. «Tashtrans.uz» хабарига кўра , янги автобус Мустақиллик байрами арафасида 44-йўналиш бўйлаб йўловчиларга хизмат кўрсатишни бошлаган.

Фото: tashtrans.uz

Автобус салонида жами ўриндиқлар сони 28 дона бўлиб, улар жуда юмшоқ ва қулай. «Автобуснинг орқа қисмидаги зина биринчи навбатда туриб кетаётган йўловчиларга маълум бир ноқулайлик туғдириши мумкин бўлган ягона камчиликдир», — дейилади сайт хабарида.

Фото: tashtrans.uz

Салоннинг олд қисми тошкентлик йўловчилар ўрганиб қолган Mercedes-Benz Conecto Low Floor автобусларидан бироз фарқ қилади, хусусан, чап томонда жойлашган ўриндиқларни, йўловчилар сони кўпайиб кетган вақтда, йиғиб қўйиш мумкин.

Фото: tashtrans.uz

Автобус салонидаги олд ғилдиракларнинг бўртиб чиққан қисми кичик шкафча кўринишида ишланган. «Бу шкафчалар техник асбоб-ускуналарни жойлаштириш учун мўлжалланган, бизнинг йўловчилар эса ундан қўл юкини қўйиш учун фойдаланса ажаб эмас», — деб ёзади Tashtrans.uz.

Фото: tashtrans.uz

«Автобуснинг яна бир жиддий камчилиги — дарчалар анча кичик ва ингича, бу эса салондаги вентилациянинг нормал кечишига халал беради. Шу сабабли жазирама кунларда тиқилинч салонда нафас олиш бироз қийин бўлиши мумкин», — дея қўшимча қилинади сайт хабарида.

Фото: tashtrans.uz

«Умуман олганда, автобусдан олинган яхши таассурот топилган камчиликлардан анча катта ва, умид қиламизки, янги MAN автобуси бизнинг йўлларимизга мослашиб, ‘ўзидан кўпайиб кетади’», — дейилади Tashtrans.uz хабарида.
Batafsil | Подробно | Read more... Daryo