Ўзбекистон олимпиячилари Словакиядаги турнирни ғалаба билан бошлади

Ўзбекистон олимпия терма жамоаси Словакиядаги халқаро турнирдаги илк учрашувида БАА олимпия терма жамоасини 1:0 ҳисобида мағлуб этди, деб хабар беради Ўзбекистон футбол федерацияси матбуот хизмати.

Фото: the-uff.com

Учрашувнинг иккинчи бўлимида Бобур Йўлдошев жаримадан ошириб берилган тўпни боши билан рақиб дарвозасига киритди ва ушбу гол ўйиндаги ягона гол бўлди.
Эслатиб ўтамиз, мазкур турнирда Ўзбекистон ҳамда БАА олимпия терма жамоаларидан ташқари Саудия Арабистони, Иордания ҳамда мезбон Словакия олимпия терма жамоалари иштирок этади.
Маълумот ўрнида, Ўзбекистон миллий терма жамоаси билан Тошкентдаги йиғинда иштирок этган «Насаф» ярим ҳимоячиси Одил Ҳамробеков олимпия терма жамоаси сафида Словакияга жўнаб кетган. Словакиядаги Дилшод Нуралиев олимпия терма жамоасига мураббийлик қилмоқда.
Аввалроқ хабар берилганидек, Словакиядаги халқаро турнир Ўзбекистон олимпия терма жамоаси учун январь ойида Қатарда бўлиб ўтадиган U-23 ёшлар ўртасидаги Осиё Чемпионати баҳсларига тайёргарлик вазифасини ўтайди.
Ўзбекистон олимпия терма жамоасининг турнирдаги навбатдаги учрашуви 1 сентябрь куни Саудия Арабистонига қарши бўлиб ўтади.
Ўзбекистон U-23 – БАА U-23 – 1:0
Гол: Бобур Йўлдошев (82).
Ўзбекистон U-23: Абдумавлон Абдужалилов, Максимилиан Фомин, Сардор Раҳмонов, Бобур Йўлдошев, Жавлон Мирабдуллаев, Отабек Шукуров, Одил Ҳамробеков, Икром Алибоев, Достон Ҳамдамов, Жалолиддин Машарипов, Забиҳилло Ўринбоев.
Batafsil | Подробно | Read more... Daryo